FOKUPERS Selebra Aniversáriu ba-Dala-24

by -6 views
Fokupers. (Foto google)

DILI (Timor Post) – Organizasaun Sosiedade Sivíl FOKUPERS selebra aniversáriu ba dala 24 ho atividade misa agradesimentu.

Diretora FOKUPERS Maria Fátima Pereira Guterres, hatete FOKUPERS harii iha tinan 1997, atu rezolve violénsia bazeia ba Jéneru no violasaun direitus umanus ne’ebé hasoru feto no labarik iha Timor-Leste durante okupasaun Indonesia mai to’o ohin loron.

“Ami realiza misa agradesimentu ida ne’e, hanesan ami-nia kultura ne’ebé tinan-tinan ami halo hodi selebra no manifesta FOKUPERS nia ezisténsia”, nia dehan ba jornalista Timor Post iha Katedrál, Kinta (15/07).

Nia dehan, Fokupers nia servisu mak atu fó asisténsia ba vítima ho linguajen FOKUPERS nian, tanba ne’e hanaran FUAN FOKUPERS, ne’e mak vítima sira.

“Ita boot sira hatene, se vítima sira ne’ebé terus no hasoru sofrementu, maibé funsionáriu FOKUPERS ida prontu atu resolve no halo asisténsia integral tomak ba iha vítima ida ho tempu ne’ebé naruk, signifika ami mós forsa atu hasoru situasaun vítima sira nian, la’ós hanesan saida mak públiku imajina iha li’ur, katak situasaun sira ne’e fasil. Signifika ami mós tenke prepara ami-nia an ho fuan boot hodi ultrapasa problema sira nee”, tenik nia.

Nia hatete, maibé sira tenke onestu kata sira brani atu halo servisu sira ne’e hotu, tanba forsa ne’e mai husi Maromak. Tinan-tinan alende serimónia oi-oin ne’ebé halo, pontus prinsipál ida mak husu misa agradesimentu.

“Atu dehan susesu karik loron ruma ita boot sira husu direita ba maluk vítima sira, durante ami-nia akompañamentu fó asisténsia konsellu no prosesu ida ne’ebé ami fó ba sira liuhusi halo kapasitasaun no treinamentu durante iha FOKUPERS nia liman,” nia hatete.

Nune’e mós Diretora FOKUPERS hato’o, mensajen ikus iha aniversáriu ba dala 24, katak “Primeiru ba iha vítima sira, ita boot sira forte ona tanba ultrapasa ona prosesu lubuk boot ida ona, entaun kontinua tulun FOKUPERS hodi hala’o misaun FOKUPERS iha ita boot sira-nia hela fatin, hodi tulun fila fali ita boot sira-nia feto maluk sira.”

Nune’e mós ba parseiru sira, “ami hatene katak servisu ba asuntu feto ho labarik nian no mós ba asuntu igualdade jéneru la’ós buat ne’ebé fasil. Dala-ruma ita mós hetan ameasa no ataka, maibé mai ita nafatin hamutuk forte hodi la’o tuir objetivu organizasaun nian ne’ebé ita hakarak atu atinje. (PJ16)