Dili (Timorpost.com): Konsellu Imprensa (KI) atualmente halo preparasaun maximu, hodi realiza Premiu Midia 2023 no selebra Loron Nasionál Liberdade imprensa dahuluk iha sidade Balibo, Bobonaro, loron 16 Outubru 2023.
Prezidente Konsellu Imprensa, Otélio Ote, informa asuntu ne’e ba jornalista Timorpost.com durante entrevista iha nia knaar fatin, Dili, Segunda-feira (4/9/2023).
“Primiu Media ne’e nuudar valorizasaun aas tebes ba servisu na’in media sira, ne’ebe hatudu kualidade aas, tuir padraun Kompanhia medi, no estandarte jornalistiku. Inklui kodegu etika jornalista,” Prezidenti KI, Otelio Ote hateten.
Premiu ba Media tinan ida ne’e halao ba dala lima. Hanesan mos tinan sira antes, Premiu tinan ne’e, hamutuk ba ema na’in lima, kompostu husi Premiu Konsellu Imprensa, Premiu Adelino Gomes, Premiu Fransisco Borja da Costa, Premiu Greg Shackleton no Premiu Bernardino Guterres.
Premiu Konsellu Imprensa, ba orgaun komunikasaun sosial ne’ebe hatudu performa jestaun diakliu, Premiu Adelino Gomes ba jornalista ne’ebe produz notisia ho dalen Portugues diakliu, Premiu Premiu Fransisco Borja da Costa ba jornalista ne’ebe produz notisia Feature diakliu, Premiu Greg Shackleton ba jornalista ne’ebe produz dokumentariu audio-vizual di’akliu no Premiu Bernardino Guterres ba jornalista fotografu ne’eb’e produz foto notisia ne’eb’e di’akliu.
“ Jornalista sira-ne’e, produz produtu jornalistiku no públiku ba iha sira-nia média ida-idak, tuir estandarte jornalistiku. Premiu ne’e hanesan meius ida atu valoriza, profisionaliza no fanu nafatin espiritu atu servisu ho kaulidade,” nia dehan tan.
Tuir planu, ekipa juri sei hahu halo avaliasaun ba notisia sira, fulan setembru nia rohan. “ Tuir regulamentu Premiu Midia atual, jornalista sira mak hatama notisia. Tuir mai ekipa juri halo avaliasaun,” jornalista senior ne’e dehan.
Atualmente, Konsellu Imprensa prepara programa sira, ba realizasaun festa Premiu Midia no Loron Nasional Liberdade Imprensa. “ La iha problema signifikante. Espera komunidade media haksolok ho selebrasaun dahuluk Loron Nasional Liberdade Imprens, tinan ne’e, “ membru Konsellu Imprensa ne’ebe lidera Konsellu Imprensa desde Fevereiru tinan ne’e, hateten.
1,095 total views, 6 views today
