TURISKAI (timorpost.com)—Domingo loron (23/07) oras tuku 09:11 jornalista Timor post halo vizita ba família uma kain ida iha aldeia Fahilebu, Suku Beremana, Postu Administrativu Turiskai, Munisípiu Manufahi.
Liu husi estrada boot ba Turiskai jornalista Timor post hakat sees hodi la’o kuaze besik kilo ida ba António Hornai ho idade kuaze 70 ho família iha aldeia Fahilebu.
To’o iha uma oin ho komprinta nune’e inan ferik Maria Doutel Sarmento hanesan António nia fen kaben hakat sai mai loke odamatan no bolu dehan alin mai no tama liu mai.
Bainhira inan ferik hafoin loke odamatan, nia sente kontente ho hafalun kedas ho matan been tan rona lian ida bolu iha uma oin.
To’o iha uma laran hare lona mean ida taka haleu hela iha kuartu ki’ik oan ida.
Hakat ho neineik to’o ba lona mean ne’e hare António Ornai tuur hakruak hela.
Iha António nia toba fatin, sorin nahe ho hadak no sorin nahe ho ai kabelak nune’e leten nahe lona mean ne’ebé didin hanesan didin ne’e ninia rohan nahe hanesan biti nune’e tau tan ho xumasu.
Ba Timor post Maria Doutel Sarmento informa, nia laen kaben antes ne’e kondisaun di’ak hela maibé sofre fali moras ne’e halo ain rua ne’e lao la di’ak kuaze tinan ida ona nune’e mak kondisaun sai isin krekas tiha nune’e.
Maria haktuir, moras ne’ebé nia laen kaben sofre ne’e halo sira hotu preokupa tebes tanba susar atu hetan ai-moruk halakon moras refere.
“Ami preokupa tebes ho nia moras ne’e, ho nia kondisaun ne’e ami forsa laiha atu hodi buka dalan atu re koopera nia kondisaun saúde “dehan Maria ba Timor post iha nia rezidénsia.
Nia dehan, uma laran sira na’in tolu de’it nune’e sira labele sai ba to’os inklui kafé laran ho distánsia ne’ebé dook.
“Ami labele sai ba dook tanba nia sente atu ba soe foer kiik ka boot ruma ami mak kous de’it ba hatur iha sintina ne’e duni loron ka kalan ami mak ko’us hodi ba li’ur” nia haktuir.
Portantu nesesidade loron-loron depende de’it ba osan idozu no invalidus ninian mai mak hodi sosa fos, mina no supermie ba han inklui nesesidade sira seluk.
Nune’e António Hornai ho lian neineik ko’alia hodi husu, nia presiza tebes ai-han, osan inklui kadeira roda (kursi roda) nune’e nia bele hodi sai ba hetan naroman tanba tuir de’it iha uma laran kuaze tinan naruk ona.
“Ha’u husu estadu se bele ajuda hela hahán, osan uitoan, roupa inklui kadeira roda ida mai, atu ha’u hodi tuur tanba ha’u kleur ona tuur no toba de’it iha kuartu laran kloot ida ne’e no susar hetan naroman no hola anin di’ak ruma” nia husu.
Iha okaziaun ne’e, António nia oan Mane Carlos Ornai dehan, antes ne’e nia eskola iha eskola balun iha Turiskai maibé tanba nia aman sofre moras ho ida ne’e nia deside sai tiha eskola.
“Ha’u eskola SMP klase 2 maibé bainhira apa enfrenta moras ema laiha atu hare nune’e ha’u deside sai tiha eskola hodi hare nia”. Nia haktuir.
Tuir nia katak, nia aman nia moras ne’e sira ba bolu duni doutór sira ba hodi hare ho matan maibé la fó ai-moruk ruma ka buka dalan seluk ba moras refere.
“Doutór ami ba bolu duni no sira mai, maibé hare de’it no la halo buat ida ne’ebé too nia moras halo isin mós tun too krekas” nia esplika.
Ba uma hela fatin maski leten taka ho kalén maibé tanba kalén dodok no feruzin ona nune’e udan boot be tama uma laran halo nia aman nia toba fatin bokon hotu nune’e toba iha be laran.
Tuir observasaun Timor post nota katak, família vulneravel ne’e nia uma ho medida kuaze 8×7 ne’ebé leten taka kalén maibé kalén frozen ona no didin ho ai betun hadak maibé hadak dodok ona.
Uma ne’e nia laran fahe ba kuartu tolu ho sala vizita kiik ida no fatin ba dispensa rai bikan, kanuru, no sanan inklui masa hodi kuru bee.(lcl).
2,289 total views, 3 views today
Bele hare Video Seluk :
Subscribe to Timorpost
