DILI—Desizaun Parlamentu Nasionál (PN), hodi hapara mandatu komisáriu Komisaun Anti Korrupsaun (CAC-sigla Portugés), Sergio Hornai, tuir Akadémiku Universidade Dili (UNDIL), Hugo Lourenço, fó impaktu ba boa governasaun iha rai laran.
“Nee hatudu katak ita nia boa governasaun laiha ita nia transparénsia laiha, nee governasaun ne’ebé mak laiha transparénsia no laiha boa governasaun”, Hugo hato’o kestaun nee ba timor post, iha knar fatin kampus UNDIL, Maskareñas, Kinta (13/04).
Nia konsidera, iha tendénsia polítika hosi ukun na’in sira atu hamate servisu KAK, tanba bainhira servisu KAK paradu automatikamente KAK laiha ona knar no kompeténsia atu halo investigasaun ba kazu sira ne’ebé mosu ona no kazu sira ne’ebé agora daudaun la’o hela liuliu iha instituisaun estadu nian.
“Loloos nee tenke muda mekanizmu, se mak atu ba tuur iha KAK nia tenke liuhusi teste, atu nune’e ema ne’ebé ba tuur nee tenke sai figura ne’ebé mak brani no forte Se lae susar tebes atu halo mudansa no dezenvolve di’ak nasaun ida nee, tanba hili komisáriu nee nomeiasaun nee mai husi partidu nee mak sira dada malu too agora,” nia preokupa.
“Tanba sá mak tenke mantein señór Jose Ximenes, laiha figura seluk husi nee, se laiha figura seluk, nusa governu la kontinua estende komisáriu Sergio Hornai nia mandatu hodi hein ba figura seluk ruma kuandu ba troka nia,” dúvida.
Tuir nia, ema ne’ebé merese lidera KAK tenke figura ida ne’ebé profisionál iha integridade, bainhira figura ne’e laiha integridade professional signifika bele haburas fali korrupsaun iha Timor.
Entretantu, Parlamentu Nasionál (PN), liuhosi karta ofísiu númeru 426/2023/V/PPN, ne’ebé asina husi Prezidente Parlamentu Nasionál, Aniceto Longuinhos Guterres Lopes, iha Kuarta-(05/04), hakotu kna’ar Komisáriu KAK ba mandatu datoluk.
Desizaun Parlamentu Nasionál ne’e hodi anula desizaun anteriór liuhosi karta númeru ofisiu 457/2023/V/PPN, 20 Janeiru 2023, ne’ebé hanaruk mandatu komisáriu CAC nian atu kontinua hala’o misaun CAC nian hodi hein eleisaun ba komisáriu foun.
Komisáriu CAC, Sergio Hornai, eleitu husi PN iha 15 Janeiru 2019, ho votu 42 husi deputadu sira lejizlatura da-limak no simu posse husi Prezidente Parlamentu Nasionál, Arão Noe, iha loron 21 Janeiru 2021, iha Uma Fukun PN.
663 total views, 6 views today
