DILI—Primeiru Ministru (PM), Taur Matan Ruak, rekoñese servisu Eis Prezidente Autoridade Rejiaun Administrativa Espesiál Oe-kusi (RAEOA), Mari Alkatiri, tanba jere infraestrutura ho kualidade di’ak.
Nia hatete, durante nia hanesan Prezidente Repúblika, kritika Eis Primeiru Ministru, Mari Alkatiri, kuandu lidera Zona Espesiál Ekonomia Sosiál Merkadu (ZEESM) iha Oe-Kusi.
“Ha’u hakarak parabéniza nia tanba infraestrutura iha RAEOA kualidade”, Taur hato’o asuntu ne’e iha abertura semináriu nasionál ba reflesaun kona-ba tinan 20 dezenvolvimentu infraestrutura iha Timor-Leste, kualidade reziliensia no sustentabilidade, iha salaun Ministériu Finansas Ai-Tarak Laran, Tersa (21/03).
Nia dehan, pelu kontráriu agora infraestrutura sira seluk ezije liután kualidade, para infraestrutura sira ne’e la’o ho kualidade no responsabilidade.
Nia haktuir, hanesan Mari Alkatiri, dehan infraestrutura la’o ba oin nafatin, laiha governu ida tama mai atu halo buat hotu-hotu, maibé importante kontinuasaun tenke la’o ba oin, atu nune’e bele sistemátiku liután.
“Ita ko’alia kona-ba ordenamentu territorial, entaun tenke iha planeamentu no kontrola la’o besik malu”, nia remata.
Portantu durante mandatu Eis Prezidente ZEESM, Mari Alkatiri, iha Oe-kusi halo ona dezenvolvimentu balu hanesan, estrada, ponte, aeroportu, irrigasaun, klínika, Otél, no Eletrisidade.
Eis Prezidente ZEEMS-RAEOA hala’o servisu iha Oe-Kusi hahú husi tinan 2014, iha Governu Dahaat Konstitusionál, ne’ebé lideradu husi Kay Rala Xanana Gusmão, no remata mandatu iha tinan 2019.
1,033 total views, 3 views today
Bele hare Video Seluk :
Subscribe to Timorpost
