Figura Ramos Merese Ba PR

by -233 views
José Ramos Horta

AITUHA (Timor Post) —Oras ne’e daudaun ambiente polítika manas ba pozisaun Prezidente Repúblika (PR) períodu tuir mai ne’ebé sidadaun lideransa partidu polítika komesa deklara ona idak-idak ninia figura ba kandidatu PR.

Tuir komunidade aldeia Raikesa, suku Aituha, postu administrativu Alas, munisípiu Manufahi, Alexandrinho da Costa hatete, figura ne’ebé merese ba prezidente iha períodu agora tenke kandidatu fali José Manuel Ramos Horta.

“Kandidatu ne’ebé ami propoin ne’e ami hare figura ne’ebé merese ba povu iha nasaun ida ne’e no mós figura diplomata ba komunidade internasionál”, dehan Alexandrinho ba Timor post iha Same, Kinta (21/07).

Nia dehan, José Ramos Horta hanesan mós lideransa tuan ida no nia bele sa’e fali Prezidente Repúblika no nia figura di’ak ba povu no nasaun ida ne’e.

“Karik ita nia lei la fó dalan José Ramos Horta kandidatu ba dala rua la buat ida maibé karik lei fó dalan entaun bele kandidatu fali”, nia dehan.

Nune’e, nia dehan, bainhira José Ramos Horta kandidata aan ba prezidente nu’udar komunidade apoiu totalmente tanba hanesan figura novel da pás ba iha rai ida ne’e.

“Ha’u pesoál ninia kandidatura favoritu ba períodu ida ne’e mak José Ramos Horta tanba ema ne’ebé iha esperiénsia nivel komunidade nasionál ho komunidade nivel internasionál”, nia subliña.

Tuir nia katak, Prezidente Repúblika tenke iha unidade ne’ebé di’ak ho maluk sira seluk liuliu na’i ulun boot sira tuur iha leten aas ne’e maibé durante ne’e hare situasaun susar tebes tanba na’i ulun sira se kotuk ba maluk.

“Ami hare katak lideransa sira la fó liman ba malu ne’e duni maski la’o duni maibé mínimu liu”, nia hakotu.(lcl)

 

No More Posts Available.

No more pages to load.