Fidelis-Peter Diskute Diversifikasaun Ekonomia iha Timor Leste

by -183 views
Fidelis Leite Magalhães (loos) no Peter Roberts (karuk). Foto Espesial

DILI (Timor Post)Ministru Prezidénsia Konsellu Ministru, Fidelis Leite Magalhães hamutuk ho Embaixadór Austrália, Peter Roberts no ekipa diskute asuntu diversifikasaun ekonómika iha Timor Leste.

“Ohin ko’alia liu kona-ba diversifikasaun ekonómika, relasaun komersiál iha futuru, liuliu liña aviasaun nian, ne’ebé mak sei hanesan buat importante ida ba iha ita-nia diversifikasaun ekonómika, bele lori turista sira barak liuhusi Austrália mai, no mós sei fasilita ligasaun di’ak liu timoroan ba Austrália no ba nasaun sira seluk,” Fidelis inf’órma ba jornalista sira iha Palásiu Governu, Kinta (14/10).

Fidelis dehan, iha sorumutu ne’e ko’alia mós kona-ba komponente kooperasaun iha setór telekomunikasaun nian, liuliu kona-ba programa fiber ótika nian. No ikus liu mak haree kona-ba ref’órma iha administrasaun publika.

“Austrália sempre komprometidu atu apoiu Timor-Leste iha programa importante sira dezenvolvimentu nian,” Governante ne’e afirma.

Fidelis haktuir, iha biban ne’e ko’alia mós kona-ba vasina, tanba Austrália mak hanesan doadór boot liu ba vasina.

“Parte Austrália nian haksolok tebes ho progresu vasinasaun, no rekoñese esf’órsu tomak ne’ebé mak Governu halo, atu bele apela sidadaun sira hodi ba vasina, no númeru ne’ebé mak aumentu husi partisipasaun sidadaun nian”. Fidelis subliña.

Entretantu, Embaixadór Austrália, Peter Roberts sente kontente tebes bele hasoru malu ho Ministru Fidelis, hodi ko’alia kona-ba prosesu vasinasaun ne’ebé mak membru Governu sira servisu makas hodi hasa’e númeru vasinasaun. No Austrália kontente tebes atu suporta programa vasinasaun, tanba ne’e importante duni ba Timor-Leste atu próteze nia sidadaun sira.

Iha biban ne’e, ko’alia mós kona-ba oportunidade iha area ekonomia, tanba agora Covid-19, maibé iha oportunidade f’óun ligasaun entre Timor-Leste no Austrália, oinsá promove turizmu no ligasaun metin liu iha area aviasaun nian.

“Ha’u fiar, katak iha tinan oin ka fulan oin mai, bele aumenta ligasaun fízika entre Timor-Leste no Austrália, no mós ko’alia kona-ba programa Austrália nian iha area Governasaun, atu oinsá bele suporta ministériu sira atu servisu efisiente liután hodi support Timor-Leste nian dezenvolvimentu,” Peter afirma. (jry)

No More Posts Available.

No more pages to load.