DILI—Prezidente Federasaun Futeból Timor-Leste (FFTL) Francisco Jerónimo hatete, informa kapasitasaun ba treinadór atu hetan lisensa B sei halo iha fulan Setembru no Novembru tinan ne’e nia laran.
“Formasaun lisensa B ba treinadór sira ninia oráriu iha ona no iha fulan Setembru nia laran sei realiza” informa Prezidente FFTL Francisco Jerónimo iha Xanana Sport Centre, kuarta (11/09).
Pakote primeiru tuir fulan Setembru depois hotu tia sei pasa fali ba iha fulan Novembru atu kompleta pakote rua atu bele hetan lisensa B.
Jerónimo relata kuaze treinadór tolunulu resin maka kandidatu atu partisipa maibé hosi AFC presiza treinadór ruanulu resin haat de’it.
Eis deputadu ne’e aprofunda halo tiha formasaun AFC sei halo tees tan, treinadór sira iha duni elizibel atu sai duni treinadór ba lisensa B duni ka lae.
“Sira ne’ebé mak pasa sira ne’e mak sei sai treinadór lisensa B, hodi fó treinu ba ita nia jogadór sira iha selesaun nasionál, nune’e mós bele ba fó treinu iha ita nia klube sira ne’ebé maka agora daudaun kompete iha liga futeból amadora segundu divizaun no primeiru divizaun” hatete Jerónimo.
Nia hatutan ba sira ne’ebé la pasa, sira kontinua mantein nafatin iha lisensa B nian hodi kontinua prepara halo di’ak liután hodi hetan oportunidade iha formasaun sira tuir mai.
Entretantu sira ne’ebé pasa mós sira labele para de’it maibé pratika nafatin saida mak sira aprende, hodi kontinua nafatin ba lisensa A nian. Jerónimo hakotu.(jmy)
