Favor Boot Ida Hakat ba Sentru Vasinasaun

by -248 views
Fidelis Leite Magalhães

Jornalista Jaime Pires / Editór Noémio Falcão

DILI (Timor Post)—Ministru Prezidensiál Konsellu Ministru, Fidelis Leite Magalhães husu ho haraik-an ba populasaun sira atu hakat ba sentru vasinasaun sira hodi simu vasina kontra moras daet COVID-19.

“Ita husu ba sidadaun sira favor boot ida hakat ba iha fatin postu saúde sira hodi simu vasina atu proteje imi nia-an proteje komunidade no proteje nasaun,” Fidelis hatete ba jornalista sira hafoin reuniaun Konsellu Ministru iha Palásiu Governu, Dili, Kuarta (13/10/2021).

Fidelis haktuir, Nia subliña, dadaun ne’e komunidade sira liu milaun mak vasina ona. Tanba ne’e, tempu badak vasina ho marka seluk mos sei too hodi oferese ba ema hotu inklui labarik sira iha teritóriu nasionál.

Nia dehan, ikus ne’e númeru infetadu COVID-19 iha Timor-Leste menus tanba sidadaun sira barak mak simu ona vasina, nune’e mak governu mós la impoin tan serka sanitária no konfinamentu obrigatóriu.

“Se ita hakarak situasaun ne’e kontinua la’o normal hanesan ne’e, atu nune ita nia dezenvolvimentu bele la’o ona, ita husu nafatin ba ita nia komunidade sira ne’ebé mak seidauk vasina ne’e hakat ba vasina atu nune’e buat hotu la’o di’ak liután,” Fidelis subliña.

Nia dehan, bainhira populasaun lakohi ba vasina no derepente númeru infetadu COVID-19 sa’e hikas, maka governu laiha opsaun seluk tenke impoin fali serka sanitária no konfinamentu obrigatóriu atu nune’e evita ema mate.

“Entaun hakarak situasaun sira ne’e kontinua nafatin, apelu ba sira ne’ebé mak seidauk vasina ba vasina, sira ne’ebé mak vasina dala ida ona ba vasina dala rua, tanba vasina dala ida mós la mate vasina dala rua mós la mate kontinua ba vasina,” Fidelis salienta.

No More Posts Available.

No more pages to load.