Fasilidade Saúde Hahú Menus Pasiente

by -196 views
Ilustrasaun

DILI (Timor Post)—Hafoin iha fulan Jullu no Agostu, Timor-Leste deklara rejistu kazu variante no kazu mortalidade inklui kazu pozitivu Covid-19 ho númeru aas, nune’e fasilidade saúde sira aplika teste swab hodi fasil deteta ema nia estatutu moras, relasiona ho kazu hirak ne’e, implika ba komunidade hela iha Dili no munisípiu ta’uk la hakbesik ona ba iha fasilidade saúde sira hodi hetan tratamentu.

Diretór Servisu Munisípiu Bobonaru, João Batista Mau Cardoso, hateten Ospitál Referral Maliana ba daudauk ne’e aplika teste swab, komunidade ne’ebé ho kazu respiratóriu tenke hetan teste swab, maibé komunidade balun hafoin to’o iha fasilidade haree médiku sira halo hela teste swab, sira halai fila ba uma.

“Ita hatene, Maliana besik area Fronteira, ema ne’ebé tama mai illegal konserteza bele lori moras no bele iha tranzmisaun ba iha komunidade. Tanba ne’e, hospital tenke aplika teste swab, maibé pasiente sira la mai halo tratamentu, tanba de’it ta’uk teste swab”, dehan João Batista, ba Timor Post via telefone, Tersa (31/08).

Jerente ne’e konta ema ne’ebé mai teste swab, maioria ema hirak ne’ebé atu ba Dili, maibé bainhira teste swab remata médiku sira fó sai rezultadu temi ho pozitivu ema la mai ona, tanba kritériu ema ne’ebé hetan pozitivu tenke tama izolamentu.

Hatán ba preokupasaun hirak ne’e ministra Saúde, Odete Maria Freitas hatete, relasiona ho pasiente ne’ebé ta’uk la hakbesik ba iha fasilidade saúde sira, Ministériu Saúde beibeik ona alerta ba iha komunidade atu labele ta’uk hakbesik ba iha ospitál.

“Uluk kedas iha ha’u nia vizita ba iha Ospitál sira, ha’u haree kama baixa ne’ebé mamuk ema laiha, ha’u preokupa. Tanba ema hirak ne’e moras ka lae, ha’u espera ema hotu di’ak, sé karik ita nia komunidade ne’ebé moras iha uma favor ida labele ta’uk ba Ospitál labele hein moras todan, tanba fatin iha Ospitál iha hela, Covid-19 ne’e moras ita nia inimigu, entaun ita tenke luta hasoru inimigu, la’ós ita ba subar no ta’uk ba inimigu”, Odete alerta.

Governante ne’e subliña, ema saúde hatene bainhira komunidade ida ba halo tratamentu signifika katak ema hotu hasoru moras.

“Ita seidauk iha hanoin atu konsidera moras Covid-19, sai hanesan moras malaria, maibé to’o tempu ida ita sei deklara kuandu iha ona estudu, ema haree ona moras ne’e atu lakon to’o bainhira, kuandu iha ona analiza ona ba ida nee, ha’u hanoin sé moras ne’e la lakon to’o tempu ida ita bele konsidera moras refere hanesan moras pandedemia iha nasaun hotu-hotu ne’ebé ita hotu iha obrigasaun luta hasoru moras refere”, nia tenik.

Tuir observasaun Timor Post, iha HNGV nota katak kama baixa ida rua iha sala emerjénsia hahú mamuk, inklui sentru saúde Formoza I — II, movimentu pasiente hahú menus, tanba fatór hosi konfinamentu obrigatóriu hodi bandu movimentu transporte públiku hala’o operasaun. (res)

No More Posts Available.

No more pages to load.