“Faru Nakles” iha FRETILIN: Pakote Rui Araújo Preparadu ba Kongresu 2021

by -10 views
Imajen ne'e hatudu kampana FRETILIN iha eleisaun

Timor Post (28/01/2021)—Kuadru Partidu Frente Revolusionáriu Timor Leste Independente (FRETILIN) inklui Eis Primeiru Ministru, Rui Maria de Araújo iha tinan rua ona halo preparasaun ba kompete ho pakote ida iha kogresu ne’ebé sei hala’o iha tinan 2021  nia laran.

Kuadru ne’ebé servisu hamutuk ho Rui Araújo, Vicente Maubocy subliña, movimentu iha FRETILIN laran la’o namanas.

“Ema hotu hakarak FRETILIN ida mais modernu, mais up to date, mais kompetetivu ho nia lideransa ne’ebé maka demokrátiku no atetude ne’ebé maka bele simu ema hotu nia opiniaun,” Vicente Maubocy ba Jornalista Timor Post via telefone hafoin asesu artigu badak ne’ebé kuadru FRETILIN ne’e fó sai iha rede sosiál Facebook katak, “Tò ona tempo atu dirigente FRETILIN tau ema ” Rai nain + Katoliko + Moderado do ke ” Ema lao rai, Musalmano i Radikal”.

Artigu Maubocy nian iha rede sosial mosu krítika maka’as tanba konsideradu hamosu diskriminasaun rasiál ka relijioza.

Maske nune’e, iha entrevista Maubocy subliña, ba futuru FRETILIN ida mais esklusivu la’ós FRETILIN ida agora inklusivu.

Maubocy dehan, FRETILIN ida agora ne’e gráfikamente tún ba bebeik.

“Ami sira ne’e mak antigu kuadrus. Doutor Marí Alkatiri sai sekretáriu jerál, Doutor Lú Olo sai prezidente, ne’e grasas ami sira kuadru de apoiu fo apou hodi kompete ho José Reis ho Rogerio Lobato,” Maubocy hatete.

Tanba ne’e, Maubocy subliña, sira ko’alia maka’as atu iha mudansa iha FRETILIN ne’e atu hadi’a, la’ós ambisaun ba pozisaun.

“To’o ona tempu, Marí Alkatiri tinan rua nulu ona. Di’ak liu fó ona fatin ba jerasaun foun,” Maubocy hatutan.

“Ema ida dehan labele ne’e ha’u hanoin nia kakutak la funsiona ona karik. Uluk funu ita dehan katak, Nicolau laiha, ida troka, Xanana laiha, ida troka. Iha FRETILIN ne’e ema barak. Jerasaun patriota ne’e barak demais,” Maubocy afirma.

Nia hatutan, kongresu FRETILIN oin mai tenke nakloke ba kandidatu sira. Iha FRETILIN, Doutor Rui Araújo serve ba asume pasta sekretáriu jerál tanba nia mós kuadru ne’ebé iha esperiénsia di’ak tebes.

Maubocy dehan, kona-ba prezidente FRETILIN la kleur kandidatu seluk sei mosu tan. Ko’alia kona-ba Maubocy iha tempu hirak liu ba sees-an tiha husi FRETILIN hodi hamutuk ho kamarada seluk harii fali Partidu Frenti Mudansa, nia afirma, nunka sees husi FRETILIN tanba iha ailaran kedas nia kuadru FRETILIN.

“Ha’u sees husi Marí, la’ós sees husi FRETILIN,” Maubocy komenta.

Kuandu FRETILIN monu iha eleisaun 2017, iha eleisaun antesipada sira mak reforsa i rejultadu hatudu FRETILIN mak manan duni ho kadeira 23.

Maubocy dehan,  FRETILIN nu’udar órgaun koletivu, iha prinsípiu justu, métodu korektu no iha baze de apoiu. Tanba ne’e, nia dehan, saida mak Marí Alkatiri halo to’o agora ne’e konsidera FRETILIN hanesan unipesoal.

“Tempu to’o duni ona. Ita boot uza faru ida nakles tiha ona, dodok no iis tiha ona, uza nafatin, ne’e labele,” Maubocy salienta.

“Hakarak ka lakohi mudansa tenke akontese. Ne’e buat ida natural. Laiha ema ida ke atu hapara mudansas ne’ebé sei mai,” Maubocy hatutan.

Ko’alia kona-ba eleisaun direita ne’ebé FRETILIN opta iha kongresu, Maubocy hatete, nia parte prontu. “Ami preparadu ona. Agora atu eleisaun direta ka eleisaun saida de’it, importante agora maka tenke mosu pakote ne’ebé militante hotu tenke hatene,” Maubocy hatete.

Pakote bele hira de’it iha kongresu mak hatudu mudansas. Nia dehan, iha eleisaun bainhira pakote ida manan, sira seluk tenke submete. “Doutór Marí bele ba ho Lu Olo nafatin ka ho ema seluk, Doutór Rui ba ho ema ida. Ami mak manan sira tenke tuir, i sira mak manan ami tuir,” Maubocy dehan.

Entretantu Maubocy nia avaliasaun ba involvimentu FRETILIN iha governu daualu lideradu Taur Matan Ruak sei dura to’o 2023, tanba prienxe maioria iha parlamentu nasional.

“Iha maioria parlamentar, CNRT hakarak doko mos labele,” Maubocy dehan. (cao)