Família Uma Kain 69 Konkorda Fila ba Munisípiu

by -560 views
Sekretáriu Estadu Protesaun Sivíl, Joaquim Gusmão

Jornalista Jaime Pires / Editór Noémio Falcão

DILI (Timor Post)- Família uma kain hamutuk 69 ne’ebé durante ne’e hela iha sentru evakuasaun tanba sai vítima husi dezastre naturál 4 Abril liu ba konkorda ho Sekretáriu Estadu Protesaun Sivíl (SEPS) fila ba ida-idak nia Munisípiu.

Ba Jornalista sira iha Rezidénsia Primeiru Ministru (PM), Taur Matan Ruak, Farol, Dili, Segunda (04/10/2021), Sekretáriu Estadu Protesaun Sivíl, Joaquim Gusmão haktuir, nia parte halo aprosimasaun no família sira konkorda ho inisiativa ne’e tanba iha Munisípiu Dili sira laiha ona hela fatin.

Nia reforsa, ba sira ne’ebé mak ba munisípiu, governu sei fó material konstrusaun uma no prepara transporte hodi tula ema no material.

“Balun ba hela fali ho família no balun hakarak ba fali munisípiu, ita sei apoiu material konstrusaun ba sira,” Joaquim subliña.

Ba sira ne’ebé mak hakarak bá hela ho familia ka familia balun oferese rai oituan ba sira atu hela, lei fó dalan ba Protesaun Sivíl hodi bele halo alojamentu ba sira, maibé kontinua halo mediasaun ho sira hodi sira bele muda ba fatin sira ne’ebé mak seguru.

“Agora dadaun iha sentru evakuasuan sira ne’e iha família uma kain hamutuk 135, 69 mak konkorda atu ba sira nia munisípiu no hela 68 mak sei halo mediasaun,” Joaquim haktuir.

Nia hatutan, sira atu ba munisípiu mak hanesan, Baukau no Oe-Kusi.

Enkuantu sentru evakuasaun sira ne’ebé mak sei eziste mak hanesan, Don Bosco, Kampo Real Madríd Manleuana, Metiaut, Manleu Has Laran, Kapela Hera, Igreja Parokia Hera.

No More Posts Available.

No more pages to load.