FAKTU KONTRA PPN BELE IMPLIKA RESPONSABILIDADE PENÁL

by -68 views

Mestre Pe. Júlio Crispim Ximenes Belo, Drs, Ldto, Mdpri

(Jurista no Akademista)

  1. FAKTU RELEVANTE JURIDIKAMENTE
  1. PPN Arão Noé de Jesus da Costa Amaral rejeita Pedidu Destituisaun ne’ebé hatama ba gabinete PPN iha 5 Maiu 2020 tuir ninia kompeténsia rasik [Regimento do Parlamento Nacional (RPN) art. 17.º n.º 1 al. d)] (DIÁRIU TIMOR POS iha 11 Maiu 2020).
  2. Vise-Prezidente Parlamentu Nasionál (Vise-PPN) na’in-rua kompostu hosi Deputada Maria Angelina Sarmento Lopez (Hosi bankada PLP) no Deputadu Luis Roberto (Hosi bankada KHUNTO) hateten prontu atu prezide meza PN (substitui PPN) hodi halo destituisaun ba PPN (TATOLI iha 12 Maiu 2020).
  3. Bankada tolu kompostu hosi FRETILIN, PLP no KHUNTO, hatama tan pedidu foun ida ba meza Parlamentu Nasionál hodi ejize (insiste ka OBRIGA) PPN Arão Noé de Jesus da Costa Amaral hodi ajenda rekerimentu kona-ba destituisaun (TATOLI iha 12 Maiu 2020).
  4. Pedidu Destituisaun refere asina hosi Deputadu sira na’in-33 kompostu hosi bankada FRETILIN, PLP no KHUNTO (TATOLI iha 12 Maiu 2020).
  5. Deklarasaun balu tenta “ofende” no limite PPN nia liberdade atu ezerse ninia funsaun tuir RPN hanesan: 1) Rekerente balun deklara katak, “se PPN la hatan rekerimentu rua uluk ne’e nusa mak tenke husu bebeik nia, nia viola ona RPN, prazu mos liu tiha ona, nusa mak ami tenke hein PPN?” (TEMPO TIMOR iha 15 Maiu 2020); 2) Deputadu balun mos husu ba PPN Arão Noé atu kuidadu tanba halo ona interpretasaun ne’ebé viola ona RPN (TEMPO TIMOR iha 14 Maiu 2020).
  6. Karik V-PPN halo substituisaun PPN tuir deit requerente sira nia hakarak no sira nia meiu oi-oin inklui deliberasaun ruma neebe kondisiona konsumasaun faktu nee.
  7. DIREITU APLIKADU BA BEM JURÍDICO PROTEGIDO

2.1. Apresiasaun ba Objecto em Causa hanesan Bem Jurídico

Relasiona ho objecto em causa, elementu koneksaun ne’ebé liga autoria ka ko-autoria sira mak “akordu espresu” hodi viola bem jurídico liberdade” hosi Prezidente Parlamentu Nasionál (PPN) atu ezerse ninia funsaun sira tuir RPN. Regimento do Parlamento Nacional rasik hateten “o Presidente tem honras de representante do segundo Órgão de Soberania” [RPN art. 14.º n.º 3]. Nune’e, insiste (OBRIGA KA KONDISIONA HO FORSA) PPN atu la bele ezerse ninia funsaun ho livre tuir RPN bele konsidera nu’udár Koaksaun kontra Órgaun Konstitusionál sira [CPT art. 204.º] no Atentadu kontra Reprezentante Másimu hosi Órgaun Soberanu [CPT art. 203.º] ne’ebé iha posibilidade ba konsumasaun faktu em causa [CPT art. 203.º n.º 2].

2.2. Apresiasaun kona-ba Direitu Aplikável ba Faktu Relevante Juridika-Penalmente

2.2.1. Krime Koaksaun kontra Órgaun Konstitusionál sira [CPT art. 204.º]

CPT konsagra Koaksaun kontra Órgaun Konstitusionál [CPT art. 204.º n.º 1] nu’udár krime típiku ne’ebé dehan hanesan tuirmai: “Quem, por violência ou ameaça de violência, impedir ou constranger o livre exercício das funções de órgão de soberania é punido com pena de prisão de 3 a 10 anos.”

Iha dispozisaun ne’e, bele hetan presopostu sira tuirmai: 1) Sujeitu ne’ebé hatudu iha termu “quem” (autoria ka ko-autoria); 2) Objetu ne’ebé hatudu iha espresaun “o livre exercício”; 3) Meius obtensaun ne’ebé hatudu iha espresaun “por violência ou ameaça de violência”; 4) Efeitu ne’ebé konfirma iha intendimentu liuhosi rezultadu “impedimento ou constrangimento do livre exercício das funções de órgão de soberania”; 5) Lezadu ka Ofendidu ne’ebé hatudu iha espresaun “órgão de soberania”; 6) Aktu ne’ebé hatudu iha espresaun “impedir ou constranger”; 7) Sansaun Penál ne’ebé hatudu iha espresaun “é punido com pena de prisão de 3 a 10 anos”.

Relasiona ho krime Koaksaun kontra Órgaun Konstitusionál sira [CPT art. 204.º], bele halo esplikasaun hanesan tuirmai: (1) Sira-ne’ebé pratika krime bele konsidera nu’udár sujeitu (autoria ka ko-autoria); (2) Meiu violénsia (meiu obtensaun) ne’ebé sira utiliza bele kompreende nu’udár “violasaun psíkika” ka “violasaun morál” (Jorge de Figueiredo Dias) liuhosi (aktu) hatama hikas rekerimentu ba PPN (Mezmuke PPN rejeita tiha ona, no tuir renovasaun inisiativa loloos la bele hatama hikas IHA SESAUN LEJISLATIVA NE’E) no halo deklarasaun balun hodi INSISTE, EJIZE no KRIA SIRKUNSTÁNSIA [tolu ne’e konsidera nu’udár CONSTRANGIMENTO] atu KONDISIONA PPN (Lezadu ka Ofendidu) nia liberdade de exercício ba ninia funsaun tuir RPN (objetu), BA IHA ÚNIKA KONDISAUN atu deside tuir AUTORIA KA KO-AUTORIA SIRA-NIA HAKARAK (Efeitu); (3) Nune’e, autoria ka ko-autoria refere sira bele hetan pena de prisão ho medida abstrata tinan 3 to’o 10 (Sansaun Penál)

2.2.2. Atentadu kontra Reprezentante Másimu hosi Órgaun Soberanu [CPT art. 203.º]

CPT konsagra krime Atentadu kontra Reprezentante Másimu hosi Órgaun Soberanu [CPT art. 203.º n.º 1] ne’ebé dehan hanesan tuirmai: “Quem atentar contra a vida, integridade física ou a liberdade de representante máximo de órgão de soberania ou de quem constitucionalmente o substituir ou de quem tenha sido eleito ou nomeado para o cargo, mesmo antes de tomar posse, é punido com pena de prisão de 8 a 20 anos.” Iha ne’e kompreende katak PPN ne’e Reprezentante Másimu hosi Órgaun Soberanu PN [CRDTL art. 67.º liga ho art. 92.º no sst. No konjuga ho RPN art. 14.º n.º 3].

Iha dispozisaun ne’e, bele hetan presopostu sira tuirmai: 1) Sujeitu ne’ebé hatudu iha termu “quem” (autoria ka ko-autoria); 2) Objetu ne’ebé hatudu iha espresaun “a vida, integridade física ou a liberdade”; 3) Meius obtensaun mak “atentado” ne’ebé bele kompreende nu’udár “tentativa” katak, ajente inisia ezekusaun hosi krime ida ne’ebé nia deside komete, ho prátiku ba parte balun ka totalidade aktu sira-ne’ebé objetivamente adekuadu atu prodús rezultadu; 4) Efeitu ne’ebé konfirma iha entendimentu liuhosi rezultadu “lesão ou ofensa a vida, integridade física ou a liberdade”; 5) Lezadu ka Ofendidu ne’ebé hatudu iha espresaun “representante máximo de órgão de soberania”; 6) Aktu ne’ebé hatudu iha espresaun “atentar contra”; 7) Sansaun Penál ne’ebé hatudu iha espresaun “é punido com pena de prisão de 8 a 20 anos”.

Relasiona ho krime Atentadu kontra Reprezentante Másimu hosi Órgaun Soberanu [CPT art. 204.º n.º 1], bele halo esplikasaun hanesan tuirmai: (1) Sira-ne’ebé pratika krime bele konsidera nu’udár sujeitu (autoria ka ko-autoria); (2) Sujeitu hosi krime refere TENTA KA KOKO (meiu obtensaun) atu OFENDE (aktu)  PPN nia funsaun liuhosi AMEASA  SUBSTITUISAUN FUNSAUN no liuhosi OBRIGA HATAMA rekerimentu ne’ebé REJEITADU ONA (ne’ebé tuir RPN la karese atu hatama iha sesaun lejislativa rasik) hodi INSISTE PPN, atu la bele uza nia LIBERDADE (objetu) tuir RPN, nune’e, PPN (Lezadu ka Ofendidu) la BELE EZERSE NINIA FUNSAUN SIRA HO LIVRE TUIR RPN (efeitu); (3) Nune’e, autoria ka ko-autoria refere sira bele hetan pena de prisão ho medida abstrata tinan 8 to’o 20 (Sansaun Penál). Wainhira atentado ba PPN nia liberdade ne’e konsumadu, katak, Vise-PPN sira ba duni substitui OBRIGATORIAMENTE PPN no prezide meza no HASAI OBRIGA PPN HOSI NINIA “KARGU”, autoria ka ko-autoria refere sira bele hetan pena de prisão ho medida abstrata tinan 12 to’o 25 (Sansaun Penál) [CPT art. 204.º n.º 2].

2.3. Apresiasaun ba Imunidade Deputadu sira

Iha Ordenamentu Jurídiku Timorense, Deputadu sira la responde sivil, kriminal ou disiplinamente ba sira nia votos (iha votasaun) iha ezersísiu ba sira-nia funsaun [CRDTL art. 94.º n.º 1 konjuga ho RPN art. 8.º n.º 1]. Hosi dispozisaun ne’e, bele hetan elementu konsetuál hanesan tuirmai: 1) Deputadu sira sei la iha respondabilidade sivil, kriminál no dixiplinár ba de’it OPINIAUN no VOTU sira iha ezersísiu sira-nia funsaun sira iha Plenária; 2) Nune’e, la iha imunidade ba violabilidade no responsabilidade kriminál ba aktu sira-seluk (alénde OPINIAUN no VOTU sira iha plenária).

Ba violabilidade no responsabilidade kriminál sira-seluk, PN bele halo levantamentu tuir RPN [CRDTL art. 94.º n.º 2 konjuga ho RPN art. 8.º]: 1) DEPUTADU SIRA BELE HETAN KAER NO HETAN PRIZAUN PREVENTIVA ho KRIME DOLOZU PUNÍVEL HO PENA PRIZAUN SUPERIÓR BA TINAN 5, mediante AUTORIZASAUN PN [RPN art. 8.º n.º 2], ne’ebé, tuir doutrina kondisaun ne’e obriga PN atu deside kona-ba tenke ka lae fo suspensaun ba Deputadu refere hodi fo prosegimentu ba prosesu [RPN art. 8.º n.º 3]; 2) Suspensaun ne’e rasik: bazeia ba solisitasaun hosi Juís kompetente liuhosi dokumentu dirijidu ba PN; hetan pareser hosi komisaun kompetente; prosede liuhosi desizaun eskrutíniu sekretu ne’ebé mak hetan maioria absoluta [RPN art. 8.º n.º 4]; 3) Desizaun la fo suspensaun ba Deputadu prodús automatikamente efeitu suspende prazu preskrisaun ne’ebé previstu iha CPT [RPN art. 8.º n.º 4].

Prazu preskrisaun ne’ebé previsu iha CPT mak hanesan tuirmai: 1) Prosesu kriminál preskreve durante tinan 20 kuandu hetan pena prizaun ne’ebé ho limite másimu superiór ba tinan 12 [CPT art. 110.º n.º 1 al. a)]; 2) Prosesu kriminál prescreve durante tinan 15 kuandu hetan pena prizaun ne’ebé ho limite másimu superiór ba tinan 7, maibé, la liu hosi tina 12 [CPT art. 110.º n.º 1 al. b)]; 3) Prosesu kriminál prescreve durante tinan 8 kuandu hetan pena prizaun ne’ebé ho limite másimu superiór ba tinan 3, maibé, la liu hosi tinan 7 [CPT art. 110.º n.º 1 al. c)]; 4) Prosesu kriminál prescreve durante tinan 4 ba kazu restante sira [CPT art. 110.º n.º 1 al. d)].

2.4. Apresiasaun ba Prosesu Kriminál

Prosesu kriminál korresponde ho natureza do crime [CPT 106.º] ne’ebé bele esplika hanesan tuirmai: 1) Kuandu nia indika katak prosedimentu kriminál só bele inisia depois ezersísiu direitu ba keixa, krime ne’e konsidera nu’udár “Krime Semi-Públiku” [CPT, art. 106.º n.º 3]; 2) Enkuantu,  kuandu norma penal la dehan katak prosedimentu kriminál ne’e depende ba keixa, krime ne’e konsidera nu’udár “Krime Públiku” [CPT, art. 106.º n.º 2]. Fundamenta ba dispozisaun rua refere, bele dehan katak, krime Koaksaun kontra Órgaun Konstitusionál sira [CPT art. 204.º] no Atentadu kontra Reprezentante Másimu hosi Órgaun Soberanu [CPT art. 203.º] to’o nia Konsumadu [CPT art. 203.º] ne’e KRIME PÚBLIKU IDA, nune’e, KOMPETE BA MINISTÉRIU PÚBLIKU ATU HAHÚ INSTAURASAUN PROSESU KRIMINÁL AUTOMATIKAMENTE (LA EJIZE KEIXA, MAIBÉ, LA PROIBE MOS KEIXA).

III. KONKLUZAUN

Fundamenta ba análize ne’ebé mak aprezenta tiha ona, bele foti sínteze konkluziva hanesan tuirmai: (1) Elementu koneksaun ne’ebé liga autoria ka ko-autoria sira mak “akordu espresu” hodi viola bem jurídico liberdade” hosi Prezidente Parlamentu Nasionál (PPN) atu ezerse ninia funsaun sira tuir RPN; (2) Relasiona ho krime Koaksaun kontra Órgaun Konstitusionál sira [CPT art. 204.º], autoria ka ko-autoria refere sira bele hetan pena de prisão ho medida abstrata tinan 3 to’o 10; (3) Relasiona ho krime Atentadu kontra Reprezentante Másimu hosi Órgaun Soberanu [CPT art. 204.º n.º 1], autoria ka ko-autoria refere sira bele hetan pena de prisão ho medida abstrata tinan 8 to’o 20 no wainhira atentado ba PPN nia liberdade ne’e konsumadu, katak, Vise-PPN sira ba duni substitui forsozamente PPN no prezide meza no hasai obriga PPN hosi ninia KARGU, autoria ka ko-autoria refere sira bele hetan pena de prisão ho medida abstrata tinan 12 to’o 25 [CPT art. 204.º n.º 2]; (4) Deputadu sira sei la iha respondabilidade sivil, kriminál no dixiplinár ba de’it OPINIAUN no VOTU sira iha ezersísiu sira-nia funsaun iha Plenária, nune’e, responsabilidade kriminál sira-seluk bele prosesa tuir formalidade ne’ebé aprezenta tiha ona; (5) Krime Koaksaun kontra Órgaun Konstitusionál sira [CPT art. 204.º], Atentadu kontra Reprezentante Másimu hosi Órgaun Soberanu [CPT art. 203.º] no nia Konsumadu [CPT art. 203.º] ne’e KRIME PÚBLIKU IDA, nune’e, KOMPETE BA MINISTÉRIU PÚBLIKU ATU HAHÚ INSTAURASAUN PROSESU (LA EJIZE KEIXA, MAIBÉ, LA PROIBE MOS KEIXA).

 

———-Bom Sucesso RDTL——–

REFERÊNCIAS BIBLIOGRÁFICAS

CANOTILHO, J.J. Gomes. Direito Contitucional e Teoria da Constituição, 6Ed. Almedina: Coimbra, 2012.

CARVALHO, Américo Taipa de. Direito Penal Questões Fundamentais, Teoria Geral do Crime, 2.ª Ed.. Coimbra Editora: Coimbra, 2011.

DIAS, Jorge de Figueiredo. Direito Penal, Tomo I, Parte Geral, Questões Fundamentais, a Doutrina Geral do Crime. Coimbra Editora: Coimbra, 2011.

DIAS, Jorge de Figueiredo. Direito Penal Português: Parte Geral, Tomo II, as Consequências Jurídicas do Crime. Notícias Editorial: Lisboa, 1993.

DIAS, Jorge de Figueiredo. Temas Básicos da Doutrina Penal: Sobre os Fundamentos da Doutrina Penal, Sobre a Doutrina Geral do Crime. Coimbra Editora: Coimbra, 2001.

DIAS, Jorge de Figueiredo. Comentário Conimbrecense do Código Penal, Parte Especial, Tomo I. Coimbra Editora: Coimbra, 1999.

HENRIQUES, M. Leal & SANTOS, M. Simas. Código Penal de Macau: Anotações e Legislação Avulsa. Imprensa Oficial de Macau: Macau, 1997.

MIRANDA, Jorge. Manual de Direito Constitucionál, Vol. II, Tomo III e IV. Coimbra Editora: Coimbra, 2010.

MIRANDA, Jorge. Manual de Direito Constitucionál, Vol. III, Tomo V, VI e VII. Coimbra Editora: Coimbra, 2010.

No More Posts Available.

No more pages to load.