F-FDTL no PNTL atu Halo Rekrutamentu Konjunta

by -2.361 views

Jornalista Jaime Pires / Editor Noemio Falcao

DILI (Timor Post)- Ministru Defeza (MD), Filomeno Paixão hatete, tinan oin sei halo rekrutamentu konjutu ba membru foun FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL).

“Ohin ha’u mai enkontru ho Primeiru Ministru hodi ko’alia kona-ba rekrutamentu ne’ebé mak atu involve F-FDTL no PNTL,” Filomeno bá jornalista sira iha hafoin diskuti kestaun ne’e ho Primeiru Ministru Taur Matan Ruak iha Rezidensia Offisial Primeiru Ministru, iha Farol, Dili, Segunda (18/102021).

Governante ne’e seidauk temi total membru foun hira mak atu rekruta, maibe Nia subliña, halo rekrutamentu dala ida atu nune’e sira bele hamutuk durante fulan ida ka rua hodi aprende kursu hamutuk, hafoin bele fahe fali balun ba Polísia no balun iha Forsa.

“Tanba ita haree iha tinan kotuk liubá ne’e ita hare hanesan forsa rua ne’e iha kompetisaun fali no balun halo konflitu ba malu, entaun ita hakarak habadak no durante tempu badak ita hakarak sira hamutuk nune’e mós sira bele koñese malu,” tenik Nia.

Tanba ne’e, nia hatutan hakarak halo rekrutamentu konjutu no iha tempu balun nia laran sira kursu hamutuk no aprende hamutuk hafoin bele fahe fali balun ba Polísia no balun iha nafatin Forsa.

“Ho ida ne’e ita hakarak tinan oin ne’e ita halo rekrutamentu konjutu mak bele koloka fali sira ba fatin rua ne’e”, Nia deklara.

Fó hanoin fali katak, antes ne’e nia parte fó sai ona katak, iha tinan oin 2022 sei halo rekrutamentu tan ba Falintil Forsa Defeza Timor-Leste (F-FDTL), hamutuk (600).

Nune’e mós Vise-Ministru Interior, António Armindo mós deklara katak, sei halo mós rekrutamentu ba Polísia Nasionál Timor-Leste (PNTL), minimu (500) no masimu (700).

Enkuantu orsamentu ba rekrutamentu ba F-FDTL ne’e hetan hetan ona aprovasaun husi Parlamentu Nasionál liuhusi (OJE), 2022 ho montante $1,2 Milloes ne’ebé mak balun mak foin dadaun rekruta ona na’in (600) tinan oin sei halo tan rekrutamentu (600).

No More Posts Available.

No more pages to load.