Ezonerasaun Élia, Taur: Ha’u Lakohi Servisu Hamutuk ho Nia

husi -16 views

DILI-Primeiru Ministru Taur Matan Ruak alerjia (lakohi servisu hamutuk ) ho Élia Antonia dos Reis Amarak iha nia governasaun. Tanba ne’e, iha prosesu ezonerasaun no aseita ona husi Prezidente Repúblika Francisco Guterres Lú Olo iha loron Sexta (03/04/2020).

“Ha’u lakohi atu servisu hamutuk ho nia. Pontu final,” Taur subliña ba Jornalista sira hafoin enkontru ho ekipa jestaun krize iha Sentru Konvensaun Dili (CCD), Segunda (06/04/2020).

Taur la esplika klaru kona-ba sala saida no iha ka la’e karta koñesimentu kona-ba desizaun ezonerasaun ba Élia, maibé dehan de’it, prezidente repúblika dekreta tiha ona karta ezonerasaun.

“Ha’u la hatene, ita boot (Jornalista) de’it  mós hatene tiha ona halo nusa mak nia (Élia) labele hatene,” Taur hatete.

Taur salienta, ema ne’ebé troka Élia nia fatin formalmente seidauk iha. Maibé nia dehan, atuál Mise-Ministru Saúde Bonifasio Maukoli dos Reis mak sei haree ba futuru.

Hamihis Feto Timor Leste

Entretantu Prezidente Rede Feto, Judite Dias Ximenes afirma, demisaun Dra. Élia Antonia dos Reis Amaral husi Vise Ministra ba Kuidadu Saúde Primária husi governu daualu, hamihis tebes feto Timor Leste seluk atu asumi kargu sira lideransa.

Liuhusi komunikadu ba imprensa ne’ebé Timor Post asesu, Segunda (06/04/2020), ne’ebé asina husi Judite Dias Ximenes subliña, demisaun ba Dra. Élia ne’e imidiatamente, hamihis tebes feto timoroan sira no la motiva feto sira seluk.

Iha komunikadu ne’e mós nota Komisaun Interministeriál ba Kolaborasaun ba Prevensaun no Kontrolu COVID-19 la sólidu bainhira halo demisaun ba Dra. Élia Amaral hanesan Ministra Interina ba Saúde iha momentu ne´ebé Komisaun ne´e tenke hamutuk hodi hasoru inimigu COVID-19.

Entretantu iha loron 3/04/3030, Primeiru Ministru Taur Matan Ruak aprejenta pedidu ezonerasaun Élia Antonia dos Reis Amaral husi kargu Vise Ministra ba Kuidadu Saúde Primária ba Prezidente Repúblika Francisco Guterres Lú Olo no hetan aseitasaun kedas iha oras hirak tuir mai hafoin simu pedidu ne’e. (cao)