Expo Dubai: FONGTIL Offisialmente Hato’o Keixa ba KAK, Delegasaun husi Timor Leste Hamutuk-134

by -1.928 views
Imajen ne'e hatudu FONGTIL entrega dokumentu keixa ba KAK. Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Forum Organizasaun Naun Governamental Timor Leste (FONGTIL) lideradu Diretór Ezekutivu, Daniel Santos do Carmo ho membru no rede servisu sira, Kinta (21/10/2021), offisialmente hato’o keixa ba Komisaun Antí Korrupsaun (KAK) relasiona ho delegasaun Timor Leste nian ba Dubai-nasaun Uni Emiradu Arabe (UEA) no gastus orsamentu.

Parte sira lori prosesu ne’e ba KAK atu halo investigasaun ba ejekusaun orsamentu ne’ebé mai hosi Orsamentu Jerál Estadu tinan fiskal 2021 ho total millaun $2,1 inklui apoiu internasionál, hahú husi preparasaun ba expo Dubai iha rai laran, gasta ba delegasaun husi Dili no durante iha Dubai.

Kona-ba delegasaun, tuir dadus ne’ebé Timor Post asesu, delegasaun Timor Leste ba Dubai hamutuk 134 inklui membru governu na’in-7.

Husi total delegasaun ne’e, na’in-14 hahú aranka ba Dubai iha loron 13 setembru 2021 hodi halo preparasaun ba fatin expozisaun Timor Leste nian, no na’in-120 aranka sai husi Dili iha loron 14 outubru 2021.

Delegasaun hirak ne’e hela iha Dubai durante fulan-ida-semana ida. Tuir planu, delegasaun Timor Leste fila mai Dili iha loron 21 outubru 2021.

Delegasaun Timor Leste lidera husi Komisáriu Jerál Autoridade Expo Dubai-Timor Leste, Manuél Vong.

Membru governu na’in-7 ne’ebé partisipa mós iha eventu ne’e inklui  Ministru Koordenadór Asuntu Ekonómiku (MKAE), Joaquim Amaral, Ministru Petróleum no Minerais (MPM), Víctor da Conceição Soares,  Ministru Transportes no Komunikasaun (MTK), José Agostinho da Silva, Ministru Agrikultura no Peska (MAP), Pedro dos Reis, Ministru Turízmu Komérsiu no Indústria (MTKI), José Lucas do Carmo da Silva, Vise Ministru Negósiu Estranjeiru no Kooperasaun (MNEK), Juliăo da Silva no Vise Ministru Turizmu Komérsiu no Indústria (MTKI), Domingos Lopes Antunes.

Expozisaun ne’ebé hala’o ona iha loron 01 fulan Outubru 2021 to’o 31 Marsu 2022 ne’e, Timor Leste aprejenta produtu liu 50 kompostu hosi produtu agríkola, artezanatu, minerál no tais.

Nasaun hamutuk 192 mak partisipa iha expozisaun ne’e.

Maske nune’e, antes ne’e mosu pro no kontra iha rai laran. Balun kontra la aseita partisipasaun Timor Leste iha eventu ne’e tanba presiza hadia uluk produsaun rai laran mak lakon osan boot ba halo promosaun iha rai liur.

Maske nune’e, governu defende katak expozisaun ne’e oportunidade di’ak ba Timor Leste.

Iha loron 10 fulan-juñu tinan 2021, Primeiru-Ministru Taur Matan Ruak, afirma, partisipasaun Timor-Leste nian iha Expo Dubai 2021 ne’e, preparasaun mai kedas iha tinan 2018, tanba ne’e la iha razaun atu kansela derrepente, hodi defende katak, partisipasaun Timor-Leste nian iha Expo ne’e, nu’udar oportunidade projeta Timor-Leste nia poténsia ba País sira iha Médiu Oriente.

Liután Xefe Governu hatete, Timor-Leste país ki’ik, nasaun barak iha Osidental, hanesan Europa, Áfrika no Mediu Oriente la hatene Timor ne’e hela iha ne’ebé, tanba ne’e ho momentu sira hanesan ne’e (Expo Dubai) bele ajuda Timor-Leste promove nia identidade, nasionalidade no poténsia sira ne’ebé Timor-Leste iha.

Expo Dubai iha Uniaun Emiradus Árabe ne’e, loloos realiza iha tinan 2020, maibé tanba pandemia COVID-19 nune’e adi’a fali mai iha tinan 2021.

No More Posts Available.

No more pages to load.