Evista Prepoténsia Abuzu Poder

by -367 views
Imajen ne'e hatudu Primeiru Ministru ho membru governu no sosiedade sivil sira sa'e ba foho Matebian. Foto Jeremias Soares

Jornalista Jeremias Soares / Editór Noémio Falcão

KELIKAI—“Nasaun sira ne’ebé soseidade kuandu fraku, ne’e governu no estadu preponente, abuzu nia poder,” Primeiru Ministru, Taur Matan Ruak subliña kestaun ne’e iha nia diskrusu iha retiru nasionál entre sosiedade sivíl ho governu, ne’ebé realiza iha Waibitai, Foho Matebian hún, Postu Kelikai Munisípiu Baukau, Sábadu (21/08/2021).

Tanba ne’e, Taur konsidera sosiedade sivíl hanesan parseiru krítiku ba prosesu dezenvolvimentu iha estadu diretu demokrátiku.

Taur hatete, prosesu dezenvolvimentu hotu atu la’o ho di’ak, presiza ema hotu nia kontribuisaun inklui sosiedade sivíl.

“Entaun sosiedade sivíl nian kontribui ba bem comum no defende sira ne’ebé labele ko’alia nia lian, ida ne’e importante tanba governu labele iha fatin hothotu no labele haree buat hothotu,” Taur hatutan.

Iha biban ne’e, Xefe Governu hato’o agradesimentu ba sosiedade sivíl, tanba hili fatin istoriku matebian sai hanesan fatin ba retiru nasionál.

“Tanba ne’e ha’u fó agradesimentu espesial ida ba sosiedade sivíl, tanba bele aseita hili fatin ida ne’e hodi hala’o reuniaun, tuir loloos ita boot sira bele halo iha Dili, tanba saida mak imi mai fali fatin ida ne’e, tanba ne’e ha’u hanoin halo konferensia iha fatin ida ne’e, iha sentidu profundu tebes liuliu ba ita boot sira nia sentimentu solidariedade ba ita-nia komunidade sira ne’ebé hela iha fatin ida ne’e, no mós ajuda promove ita-nia foho ida ne’e”, Taur afirma

Iha fatin  hanesan, reprezentante sosiedade sivíl  Paula Corte Real, deklara sosiedade sivíl nia papel hanesan parseiru krítiku iha prosesu kontrusaun Estadu ida ne’e.

Sosiedade Sivíl hala’o nia papel krítiku bainhira iha asaun, desizaun no ezekusaun ne’ebé kontradis ho prinsípiu demokrátiku, maibé sosiedade sivíl hanesan parseiru ida ne’ebé sei servisu hamutuk ho Governu, sei fó apoiu másimu no sei kolabora bainhira iha desizaun no asaun  ezekusaun ne’ebé responde nesesidade Povu Timor-Leste.

Governu nia papel mak fó atendimentu ou prestasaun servisu ba populasaun tomak hodi liberta populasaun husi ki’ak no mukit liuhusi programa Governu no planu asaun tinan-tinan. Maiske nune’e, sosiedade sivíl no Governu iha diferente karakter balun, Governu iha poder politika ka de-juri reprezenta Povu no Sosiedade Sivíl.

“Maiske ita diferente iha aproximasaun, maibé  tan sa ita bele servisu hamutuk, ita hamutuk tanba iha objetivu rua,  primeiru objetivu Estadu mak halo ita servisu hamutuk ou tanba ita servisu ba objetivu ida de’it tuir Konstituisaun Repúblika Demokratika Timor-Leste artigu-6, segundu hamutuk iha objetu signifika benefisiairu no sujeitu signifika partisipasaun ativa, populasaun sai na’in ba dezenvolvimentu iha Timor-Leste”, Paula afirma.

Paula hatete, oinsá  bele aplika servisu hamutuk hodi aselera dezenvolvimentu, Governu iha mandatu konstituisional atu halo programa ne’ebé fó moris di’ak ba povu liuhusi hala’o dezenvolvimentu fiziku no non-fiziku, no sosidade sivíl halo monitoring hodi fó rekomendasaun sira, nune’e garante servisu ne’ebé Governu halo fó  duni benefisiu ba Estadu.

Fator sira ne’ebé hanoin  atu aselera dezenvolvimentu, mak hanesan Governu tenke aselera kapital sosial, edukasaun, saude no bee moos, nu’udar prioridade ba vida moris Povu nian, no iha planu OJE 2022 Governu mós fó prioridade ona, no soseidade sivíl hein katak alokasaun ka pakote fiskal Governu sei fó prioridade.

Parte Governasaun, Gavernu tenke aselera implementasaun politika dezentralizasaun atu garante dezenvolvimentu partisipativu populasaun nian iha nivel hotu nu’udar forsa ba rezolusaun problema nasionál.

Parte infraesturtura bazika irigasaun, postu saude, bee moos, sanitasaun, infraesturtura eskola, estrada rural no eletrisidade tenke konsiadera nu’udar prioridade ba Governu ka politika ne’ebé de’it mak sei ukun.

Setor produtivu no setor ne’ebé bele fó rendimentu konsumu interna no interese esportasaun, setor turizmu atu kria kampu servisu hodi garante sustentabilidade finansiamentu estadu hodi hamenus dependensia ba setor mina-rai.

Maiske soseidade sivíl mós halo papel hodi tau matan ka monitoriza programa Governu nian, maiibe sosiedade  sivíl sei enfrenta dezafiu atu bele assume papel, tanba espetasaun husi komunidade no sosiedade sivíl kapas tebes, maibé sei iha dezafiu komum mak limitasaun finansiamentu.

“Ho nune’e sosiedade sivíl espera mós rekursu Estadu nian bele fó konsiderasaun ba sosiedade sivíl, hanoin ruma mak ami hakarak sujere mak atu hametin parseria krítiku, sosiedade sivíl hanoin katak kada tinan husi Governu aloka $1.5 billaun ba dezenvovimentu, maizomenus sosiedade sivíl presiza 1% husi total orsamentu alokadu kada tinan hodi sosiedade sivíl bele ativu hodi tau matan no akompana implementasaun orsamentu iha teritoriu nasional”. Paula fó hanoin

Entretantu, iha biban ne’e, organizasaun sosiedade sivíl sira koloka preokupasaun sira kona-ba problema edukasuaun, agrikultura, rai, infrasturtura, saude, justisa, finansas, turizmu inklui setor social ba membru Governu sira ne’ebé mak partisipa iha retiru refere.

Marka prezensa iha retiru nasional ne’e, kompostu Vise Prezidente Parlamentu Nasionál  Maria Angelina Sarmento no deputadu balun, membru VIII governu konstituisional, Prezidente Autoridade Baukau Olivio Freitas, Komandante PNTL Baukau Armando Monteiro, Veteranu, inklui Komunidade Postu Kelikai no Bagia. No orsamentu ne’ebé mak gasta ba atividade refere hamutuk $67 mill. (jry)

No More Posts Available.

No more pages to load.