EUA Oferese Pfizer Doze 100,620, SAMES Preparadu

by -225 views
Estadus Unidus Amérika (EUA) oferese vasina ho naran Pfizer hamutuk doze 100.620 mai Timor-Leste. (Foto TP/Estajiadu Deny)

(Jornalista Estajiadu Mj10/Mj7/Editora Suzana Cardoso)

DILI (Timor Post) — Atu prevene Covid-19 nia da’et maka husi Estadus Unidus Amérika (EUA) oferese vasina ho naran Pfizer hamutuk doze 100.620 mai Timor-Leste (TL) hodi fó vasinasaun ba labarik ho idade tinan 12 to’o tinan 17.

Hafoin Vasina Pfizer doze 100.620 ne’e to’o iha aeroportu Prezidente Nicolau Lobato iha loron Sábadu ((16/10), diretamente transfere ba Servisu Autónomu de Medikamentu no Ekipamentu Saúde, Institutu Públiku (SAMES,IP) ne’ebé preparadu ona hodi halo prezervasaun.

“Ha’u kontente tebes. Ohin mai entrega vasina Pfizer ba Timor Leste, Estadus Unidus entrega vasina ne’e ba governu Timor-Leste (TL) atu hasa’e komunidade nia imunidade hodi kombate Covid-19 ne’ebé hamate ema barak iha mundu.”

Haktuir Embaixadór EUA iha Timor-Leste (TL), Tom Daley ba Jornalista iha Aeroportu Prezidente Nicolau Lobato, Sábadu (16/10/21).

Hanesan saida mak Prezidente Estadus Unidus mensiona katak Embaixadór Tom, fornesimentu vasina sei kontinua oferese bazeia ba nasaun sira nia nesesidade atu utiliza, inklui TL ne’ebé nia númeru vasinasaun sei menus hosi total populasaun.

Atu kombate Covid-19, antes ne’e Estadus Unidus kontribui ona osan besik US$5 milloes ba TL. Iha parte seluk Embaixadór Tom kestiona kona bá vasina AstraZeneca nia stock balun sei iha armazenamento ne’ebé fulan oin ameasa sei expirado.

“Vasina AstraZeneca mós di’ak. Maibé, infelizmente la bele uza ba labarik sira ho ida tinan 12 ba kraik. AstraZeneca so uza ba ema ne’ebé mak tinan 18 ba leten. Entaun ho fornesimentu vasina Pfizer ne’e bele ona utiliza ba labarik sira ho idade 12,” Embaixadór Tom esplika.

Iha Fatin hanesan Ministru Edukasaun Juventude no Desportu (MEJD) Armindo Maia lori Governu no povu TL nia naran hato’o obrigadu barak ba Governu EUA liu husi COVAX fasilita ba parseiru sira seluk, hanesan UNICEF hodi fasilita vasina Pfizer doze 100,620 mai TL.

“Benefísiu boot tebes ba labarik besik rihun 50 hodi bele hetan vasinasaun. Ba preparasaun atu simu vasinasaun ne’e, Ministériu Edukasaun, Juventude no Desportu serbisu hamutuk ho Ministériu Saúde halo ona recapitulação no formatu ba labarik sira ne’ebé mak atu simu vasinasaun ne’e,” Armindo dehan.

SAMES Preparadu

Antes ne’e ba Timor Post, Diretór ezekutivu SAMES, Santana Martins esplika, atu asegura ai moruk vasina Pfizer hosi SAMES,IP instala ona jeleira no halo ona teste hodi hatene nia temperatura liga ho eletrisidade.

Katak Santana, SAMES aumenta tan liña eletrisidade ba rua ona. Liña ida hosi Kampu Alor no liña ida seluk dada hosi estrada boot Fatuhada hodi eletrisidade mantein nafatin iha oras 24 nia laran.

Maski katak Santana, SAMES antes ne’e iha jeradór. Maibé efeitu husi inundasaun iha loron 04 Abríl tinan ne’e avaria tiha. Nune’e SAMES tenke halo elevasaun aas liu para asegura jeradór ne’e labele iha failansu tan.

“Kompeténsia atu jere vasina di’ak maka SAMES, I.P instala ona jeleira vasina Pfizer. No tama ona ba fase kona-ba oinsá atu utiliza. Nune’e bainhira vasina Pfizer ne’e mai, ami lojístika SAMES nian preparadu ona,” katak Santana.

Antes simu doasaun fasilidade Maskra no Hand sanitizer hosi SAMES,IP ba jornál Timor Post hetan esplikasaun kona bá sistema armazenamento ai moruk Vasina Covid-19. (Foto konributor media SAMES)

 

Aleinde ne’e Santana haktuir, atu sistema armazenamento lao ho di’ak maka fó ona treinamentu ba funsionáriu SAMES kona-ba asesu iha jeleira vasina Pfizer. Tanba jeleira vasina Pfizer sensitivu. Tenke kuidadu ho rekizitu, ezemplu temperatura menus 70 Celsius ne’e sei sai fatuk tiha.

“Entaun tenke iha jestaun ne’ebé di’ak. Maibé atu lori ba munisípiu dentru loron 30 tenke rai fali iha temperatura (+20 c) to’o (+80c), atu nune’e labele hetan estraga. Kuandu iha ona fasilidade dentru husi temperatura 30 dias to’o 31 ne’e nia data expire ona,” katak Santana.

Daudaun ne’e komunidade TL uza ona vasina AstraZeneca ne’ebé produs hosi farmásia Inglaterra. Vasina AstraZeneca TL hetan ho doasaun hosi EUA no Nasaun viziñu Australia. AstraZeneca nia eficácia 62,1 por sentu . Vasina AstraZeneca fó ba sira ne’ebé idade 18 ba leten.

Vasina seluk mak vasina Sinovac. Komunidade TL uza vasina Sinovac hafoin hetan doasaun hosi Nasaun Xina. Maski hetan kontrovérsia ba ninia efikásia, maibé hafoin lider Nasionál Kay Rala Xanana Gusmão simu vasinasaun Sinovac konsege dada Timoroan ninia interese hodi ba simu vasinasaun. Eficácia hosi vacina Sinovac 65,3 pursentu. Vacina Sinovac Uza deit ba sira ne’ebé ho idade 18 ba leten.(Lee notísia relevante iha Jornál Timor Post)

No More Posts Available.

No more pages to load.