EU Apoiu Fasilidade IAD Ba UNTL

by -181 views

DILI (Timor Post) – Atu dezemvolvimentu edukasaun direitus umanus iha Sudeste Aziátiku sai forte liutan maka sentru direitus umanus iha Universidade Nasional Timor Lorosa’e (UNTL) hetan apoiu fasilidade aprendizajen distánsia nian.

Tuir komunikadu imprensa ne’ebé redasaun online Timor Post (www.timorpost.com) simu, fasilidade aprendizajen distánsia nian ne’e anunsia hosi sentru direitu umanus UNTL ho Kampus Global ba Direitus Umanus no Delegasaun Uniaun Europeia EU iha Timor Leste liu hosi Insiativa Aprende Dijitál (IAD).

“UNTL nia Sentru Direitus Umanus ne’ebé apoiu hosi UE espera bele fo kontribuisaun boot ba ensinu no komprensaun direitus umanus iha Timor-Leste (TL),” katak Embaxadór Uniaun Europeia nian, Andrew Jacobs iha sorumutu dijitál ne’ebé halao foin lalais ne’e iha UNTL.

Andrew apresia hodi fó agradese ba insiativa hodi bele hamosu inisiativa aprendizajen dijitál ida ne’e hodi halo estudu ba direitus umanus asesível liu tan.

Sei nafatin hosi komunikadu imprensa ne’e katak, IAD permite atu kombina hanorin dijitál ho partisipasaun aulas. Inklui livru-didátiku foun, ho video-aulas hamutuk 30, Power Point slides no glosáriu mak elabora ona iha lia tetun no ingles.

Rekursu hirak ne’e kria ba manorin no asistente-manorin Direitus Umanus UNTL sira, no estudante sira ba kursu transversal foun, mak adopta husi UNTL iha 2020 no sei implementa iha semester ida ne’e nu’udár edisaun pilotu.

Iha sikun seluk vise-reitor UNTL ba asunto akadémiku professor Samuel Freitas esplika, inisiativa ida ne’e nu’udar instrumentu foun ba estudu no treinamentu hodi kontribui ba inovasaun didátiku husi Universidade Nasional hodi promove edukasaun direitus umanus tuir fakuldade ida-ida nian, hahú ho kursu transversál.

Katak Samuel, materia hotu-hotu dezenvolve ona hamutuk ho peritu akademiku rejionál husi kampus global nian iha Ázia-Pasífiku no mos rede Universidade ASEAN nian. Hirak ne’e adapta ho kuidadu no prova on aba graduadu direitus umanus Timoroan, dosente no alumni UNTL sira ne’ebé treinadu durante projetu.

Alende ne’e iha kolaborasaun husi organizasaun direitus umanus balu iha Timor Leste hodi hatama ezemplu lokál no estudu kazu, hirak ne’e maka CNC, PDHJ, ALFeLa, ADTL no La’o Hamutuk.

Esplikasaun hanesan mai hosi Jestór Projetu Kampus Global, Adriano Remiddi. Nia hateten, IAD foka liu ba nasaun báziku husi estudu direitus umanus. Nomos tópiku seletivu sira ne’ebé relevante ho asuntu presaun sira iha Timor Leste.

“Ami haksolok ho inisiativa ida ne’e, liuliu ba livru-didátiku, mak públika ona nu’udar rekursu nakloke no sei disponível ba ema hotu,” katak Adriano hodi hatutan.

Tinan akadémiku ida ne’e IAD disponível ho versaun beta atu tulun edisaun pilotu ba kursu foun ne’e. Matéria hotu-hotu sei finaliza no publika hikas fali iha tinan 2022 hafoin inkorpora komentariu sira husi estudante no manorin sira. Inisiativa hotu-hotu edukasaun direitus umanus nian iha Timor-Leste sei hetan autorizasaun atu utiliza matéria hirak ne’e no apoia sira nia konsellu valiozu sira. (*/una)

 

No More Posts Available.

No more pages to load.