Estudante Triste Governu Reativa Atividade La Inklui Eskola

by -27 views
Foto Konsellu Ministru

(Jornalista José Mauno / Editór Mario da Costa)

DILI (Timor Post) Estudante iha kapitál Dili sente triste ho desizaun Konsellu Ministru (KM) kona-ba reativa atividade iha munisípiu Dili tanba atividade hotu-hotu reativa ona hela de’it eskola mak pendente nafatin.

Estudante Universidade da Paz Batista Cardoso, hatete ba Timor Post iha Jardín 5 de Maiu Kolmera Dili Sábadu (19/06) katak agora lahatene karreta hanesan mikrolete la’o ona, bele ba misa ona, maibé lakohi loke eskola.

“Ha’u triste haree karreta sira la’o ona ema tama ba restaurante barak, ita haree merkadu sira lokraik-lokraik rame sira la bandu atu ba eskola mak bandu,” nia hatete.

Estudante ne’e konsidera desizaun konsellu ministru ba reativa atividade iha munisípiu Dili hamosu diskriminasaun liuliu eskola tanba atividade hotu la’o ona, eskola mesak mak sira lakohi loke.

Sorin seluk estudante Abílio da Conceição, reforsa loloos ministériu edukasaun, juventude no desportu, ho ministériu ensinu superior, siénsia no kultura, iha ona polítika atu oinsá mak reativa eskola labele nonook halai hotu ba Covid-19.

“Ha’u rasik haree ministériu rua ladún iha hanoin ba ita hanesan estudante, ema hotu la’o livre ona, maibé eskola sira lakohi loke ne’e ministériu la iha polítika hodi hadi’a nia ministériu,” nia kestiona.

Iha fatin hanesan, Reitór Universidade da Paz, Adolmando Soares Amaral, hatete maski atividade hotu-hotu iha Dili la’o fila fali ona, maibé serka sanitáriu ne’ebé governu estende tan ba loron 7 atividade letiva mós kontinua pendente ho razaun la klaru.

“Ami universidade da Paz haree desizaun konsellu ministru la justu tanba bele reativa atividade transport públiku, ita bele reativa atividade ekonomia, misa ita bele reativa tanba sá mak ita labele reativa atividade aprendizajen, ita hakarak nafatin paradu,” nia kestiona.

Nia hatutan, razaun la reativa atividade letiva la iha lójika tanba laiha diferensa ho atividade sira hanesan temi ona iha leten, tuir loloos fó ona oportunidade ba eskola sira atu reativa ensinu aprendizajen tantu husi ensinu báziku to’o ensinu superior. (Lee notísia seluk iha Jornál Diáriu Timor Post)