Estudante Na’in-28.654 Laiha Kaderneta Orijinál

by -134 views
Ilustrasaun

DILI (Timor Post)Estudante sira iha munisípiu Dili, besik rihun 29 mak seidauk iha kaderneta orijinál (KO), tanba ministériu edukasaun, juventude no desportu (MEJD) tinan tolu ona la produs hodi distribui ba eskola.

Diretór Eskola Ensinu Sekundáriu Tékniku Vokasionál Teknolojia no Indústria 28 Novembru Dili, Pedro da Silva Ximenes, hatete tuir dadus husi servisu edukasaun munisípiu Dili, katak estudante ensinu sekundáriu hamutuk na’in-28.654, ne’e kompostu husi ensinu sekundáriu jerál na’in 24.589 husi eskola hamutuk 22 no ensinu sekundáriu tékniku vokasionál na’in 4.065 husi eskola hamutuk 9 iha munisípiu Dili.

“Ami tinan tolu ona seidauk simu kaderneta original husi ministériu edukasaun juventude no desportu, semana kotuk ami hare iha media ministru dehan fahe ona kaderneta ba eskola maibé ami seidauk simu,” nia hatete Timor Post iha kna’ar fatin Bekora, Sábadu (14/08).

Nia dehan, durante tinan tolu profesór sira hakerek valor iha surat tahan ida sai hanesan kaderneta provizóriu. Asuntu ne’e dirijente eskola sira sempre hato’o ona ba edukasaun maibé to’o ohin loron seidauk iha rezultadu.

Diretór eskola ensinu sekundáriu jerál 4 de Setembru UNAMET, Sergio da Cruz, hatete tinan tolu ona eskola la simu kaderneta original tanba ne’e agora estudante husi primeiru ano to’o terseiru ano laiha kaderneta original.

“Ami to’o agora seidauk simu kaderneta husi ministériu edukasaun. Tinan tolu ona la fahe mai ami, iha ne’e total estudante hamutuk 4.155 laiha hotu kaderneta original,” nia informa.

Nia hatete, durante kaderneta original laiha eskola buka mekanizmu rasik hakerek valor iha surat sai hanesan kaderneta provizóriu tanba inan-aman sira presiza haree nia oan nia valor kuandu remata ezame.

Sikun seluk, Diretór Eskola ESTV Hera, Francisco Fernandez, hatete tuir informasaun katak ministériu edukasaun fahe ona ba edukasaun munisípiu Dili, maibé seidauk distribui ba eskola sira.

“Ita espera semana oin bele fahe ona ba eskola sira. To’o ohin loron eskola seidauk simu kaderneta, ami-nia estudante total 154 seidauk hetan hotu kaderneta,” nia informa.

Francisco sujere ba MEJD liuliu edukasaun munisípiu Dili atu fahe ona kaderneta ba eskola sira tanba estudante terseiru ano hela fulan hira de’it atu tuir ona ezame nasionál.

Antes ne’e Ministru Edukasaun, Juventude no Desportu, Armindo Maia, hatete MEJD produs ona kaderneta no fahe ona kaderneta orijinál ba eskola sira iha territóriu laran tomak.

Maibé ministru mós rekoñese, durante ne’e problema ida mak kaderneta orijinál, asuntu kaderneta maski ki’ik maibé tinan tolu governu liuhusi MEJD seidauk rezolve.

“Kaderneta eskolár maka sai problema, ita tun ba eskola sira hotu-hotu dehan ami kaderneta laiha, tenke hakerek de’it iha surat tahan ida, ne’e problema ida simples maibé ita labele rezolve,” nia hatete iha sentru impresaun MEJD, Komoro, Sesta (13/08).

Nia hatutan, problema kaderneta orijinál simples, la’ós sofistikadu ida, ida ne’e mós labele responde ne’e presiza tetu no presiza atu rezolve kestaun ida ne’e.

“Ha’u hakarak apela nafatin ba ita hotu-hotu atu bele servisu maka’as nafatin tanba servisu ba oin sei barak,” nia rekomenda.

Entretantu husu kona-ba dezastre naturais estraga estudante sira-nia kaderneta Maia hatete, agora MEJD hamutuk ho eskola buka hela mekanizmu atu resolve.

Kaderneta balu ministériu distribui tiha ona hahú iha fulan Maiu, agora daudauk matéria sira ne’ebé produz ona agora distribui daudaun.

“Ministériu ita hamutuk ho eskola para haree ida ne’ebé bele rekupera, bele halo no sira ne’ebé labele ita buka solusaun atu rezolve kestaun ida ne’e,” nia hatete.

Iha fatin hanesan, koordenadór unidade kurríkulu nasionál, Pedro Gonçalves, hatete MEJD hamutuk ho parseiru dezenvolvimentu sira produs ona kaderneta lubuk ida ba estudante primeiru, segundu no terseiru siklu iha territóriu tomak.

“Ha’u atu fó hanoin fali katak kaderneta ba primeiru no segundu siklu hamutuk 179.928 ita halo ona distribuisaun ba munisípiu iha fulan Abríl no Maiu tinan ida ne’e no apoiu parseiru sira halo kaderneta ba estudante ensinu báziku terseiru siklu hamutuk rihun 90,” nia hatete. (ono)

No More Posts Available.

No more pages to load.