Estende EE La Prejudika Servisu TDD

husi -14 views

Reportajen Cesaltina Ximenes/ editor Mateus da Cruz

DILI (Timor Post)-Maske governu kontinua estende tan estadu emerjénsia ba dala 15 maibé ida ne’e la prejudika ba efetividade servisu normal iha tribunál tanba sei kontinua la’o hanesan baibain.

Juis Administradór Tribunal Distrital Dili (TDD), Afonso Carmona, hatete razaun tribunál mantein atividade servisu normal, tanba tribunál hakarak termina prosesu pendente hotu iha tinan ida ne’e nia laran.

“Maske governu estende tan estadu emerjensia ba dala sanulu resin lima, ne’e regra baibain ona, ne’ebé liga ho Covid-19, agora ida ne’e sei la prejudika ona atividade prosesu normal,”nia dehan, ba Timor Post, iha nia servisu fatin, Kinta (01/07).

Nia hatete, se iha dekretu foun ne’ebe governu hasai  dehan tan konfinamentu obrigatoriu mak tribunal sei tetu, se kuandu dehan deit estadu emerjensia mak prosesu julgamentu iha tribunál sei la’o hanesan baibain.

“ita sei hare lai,  regra sira iha dekretu lei nee iha mudansa balu ka lae, se,”dehan nia.

Nia dehan, ba parte sira ne’ebé envolve prosesu julgamentu, hanesan arguidu sira, kuandu iha prosesu julgamentu parte balu lamarka prezensa mós tribunal la fo kulpa, tanba tribunal kumprende iha situasaun.

“Tribunal iha regra provizoriu, katak ita sei la aplika sansaun rum aba parte balu hanesan Arguidu ka vitima inklui sasin mak la marka prezensa parante iha estadu emerjensia ho karakter konfinamentu obrigatoriu, tanba ita kompriende katak laiha transporte ba sira atu halo viazen mai tribunal,”dehan nia.

Tanba ne’e tuir nia importante liu mak iha liña koordenasaun, katak kuandu la disponivel tenke informa ba parte ofisial sira hodi hato’o justifikasaun ida ne’e adekuadu.

Kuandu laiha justifikasaun ida adekuadu, ka la hatudu razaun loloos mak tribunal sei la konsidera iha prova.

(lee notisia seluk iha Jornal Timor Post)