Esperansa Akadémiku Sira Nian ba Diálogu Entre Líder Istóriku iha Loron 10 Fevereiru 2020

husi -193 views

DILI—Matenek Na’in Universidade Nasionál Timor Lorosa’e (UNTL), Júlio Aparício, subliña bainhira lideransa tuan sira tur hamutuk ona maka impase polítika mós laiha ona. Nune’e bele lori moris di’ak ba povu no nasaun.

“Povu Timor hotu-hotu fó fiar ba Maun Boot Xanana, Ramos Horta, Lú Olo, Taur, Mari Alkatiri no Lere, bainhira sira na’in lima ne’e mak tuur hamutuk ha’u fiar situasaun polítika ne’ebé akontese kuaze tinan rua resin ona bele rezolve,” Júlio ba Timor Post iha kampus UNTL Kaikoli, sesta (07/02/2020).

Nia hatutan, kuandu sira na’in lima hadomi duni rai ida ne’e, maka nia fi’ar diálogu ne’ebé tuir ajenda husi Prezidénsia Repúblika sei hala’o diálogu entre líder istóriku no personalidade hamutuk na’in hitu inklui Prezidente Repúblika Francisco Guterres Lú Olo, sei hetan rejultadu pozetivu.

“Sira na’in lima mak tuur kuandu ko’alia ema hotu tuir de’it tanba ema hotu liuliu povu fó fiar ba sira,” Júlio hatutan.

“Ba ha’u kuandu sira iha vontade ne’ebé di’ak, interese privadu la tama iha neebá, ha’u fiar katak sira sei deside futuru Nasaun ne’ebé di’ak hodi lori povu ba moris di’ak,” nia dehan.

Entretantu iha sorin seluk Reitór Universidade Oriental Timor Lorosa’e (UNITAL), Florindo Pereira hatete, fiar nafatin maun sira tanba uluk terus ba rai ida ne’e i bainhira tuur hamutuk ona maka problema ne’ebé akontese Daudaun bele rezolve.

“Ha’u hanoin ita nia maun boot sira ne’e uluk funu, sofre to’o ita ukun an ne’ebé sira iha Espíritu Nasionalizmu, bainhira sira tuur hamutuk ideia ida bele hetan solusaun di’ak ba ita nia Nasaun,” Florindo Subliña.

Superior UNITAL ne’e hatutan, sira mak uluk iha oin hodi funu sofre durante 24 anos nia laran ne’ebé sira sei la estraga Nasaun ne’ebé sira rasik mak harii.

Esperansa nia, ha’u fiar katak sira bele liafuan ida atu rezolve problema ne’ebé mak mosu iha ita rain.

“Sira tuur hamutuk iha unidade ne’ebé mak uluk iha funu laran hamutuk nafatin, ha’u hanoin tempo ida ne’e Mós sira tuur hamutuk Hanesan ne’e, ha’u iha esperansa katak bele solusiona ita nia problema ne’ebé mak iha,” Hakotu nia.

Entretantu Prezidente Repúblika Francisco Guterres Lú Olo konvida espesial líder istóriku no personalidade na’in-neen atu halo reuniaun iha loron 10 Fevereiru 2020 hodi sira-nia hanoin kona-ba situasaun polítika-konstitusionál atuál.

Lihusi komunikadu ba imprensa ne’ebé Timor Post simu husi Palásiu Prezidensiál Nicolau Lobato, Dili, 05 Fevereiru 2020, haktuir, líder istóriku  no personalidade sira ne’e maka hanesan Eis-Prezidente Repúblika no Eis-Primeiru-Ministru  Kayrala Xanana Gusmão, Eis-Prezidente Ramos Horta, Eis-Prezidente no atuál Primeiru-Ministru, Taur Matan Ruak,   Eis- Primeiru Ministru Mari Alkatiri, Xefe Estadu-Maior-Jenerál F-FDTL, Majór-Jenerál Lere Anan Timur no veteranu Roque Rodrigues.

“Hamutuk ho líder no personalidade hirak ne’e,Xefe Estadu sei“halo análize no identifika opsaun sira ne’ebé di’akliu hodi hadi’a  situasaun polítiku-konstitusional atual”. Subliña iha komunikadu imprensa.

Reuniaun espesial ne’e hala’o relasiona ho rejeisaun Proposta Lei Orsamentu Jerál Estadu 2020, iha 17 janeiru tinan ida ne’e iha Parlamentu Nasional. Nune’e, Prezidente Repúblika uza kbiit husi  artigu 74 Konstituisaun RDTL, atu garante unidade Estadu no funsionamentu regular instituisoins demokrátikas.

Ho kbiit ida ne’e mak  Prezidente Repúblika halo diálogu tiha ona ho líder polítiku no entidade relevante sira tuir mai: Forum Organizasaun Sosiedade Sivíl oioin (FONGTIL), juristas, Igreja Katólika no konfisaun relijioza sira seluk, Câmara do Comércio e Indústria de Timor-Leste (CCI-TL), Conselho Combatentes da Libertação Nacional,  organizasaun rezistensia hamahon-an iha Konsellu Nasional Juventude Timor-Leste,  Centro de Estudo para a Paz e Desenvolvimento (CEPAD), Movimentu Asukai Lorosa’e noFORSAREPETIL  husi 23 janeiru to’o 07 fevereiru 2020.

Ikus liu Xefe Estadu mós sei rona no tetu hanoin sira hosi ninia órgaun konsulta – Konsellu Estadu,  molok foti dezisaun relasiona ho situasaun polítiku-konstitusionál ne’ebé oras ne’e Nasaun hasoru.

Prezidente Repúblika kompromete atu nafatin hala’o diálogu hodi rona hanoin husi lider no sidadaun sira atu ita hotu hamutuk lori polítika dezenvolvimentu  ba  povu tomak nia bem-estar no justisa sosial. Ba Povu no Nasaun nia di’ak, Prezidente Repúblika sei halo esforsu hotu-hotu.  (ato)