Espasu Indijita Ba Arte Moris Okupadu

by -19 views
Kreatividade Arte Moris

DILI—Futuru Joven kriativa iha Arte Moris daudauk ne’e la hatene atu muda ba fatin própriu ida ne’ebé, tanba fatin ne’ebé durante ne’e sira utiliza konsellu veteranu sira hahú hamoos ona atu halo konstrusaun.

Tuir observasaun Timor Post ba armazena testil Bebora, Sesta (25/06), edifísiu armazena daudauk ne’e Xineza sira maka aluga, no uma boot iha klaran laiha ida mak mamuk, maibé husi uma sorin parte leste nian hamriik hanesan fali konstrusaun Bengkel ne’ebé nakonu ho fo’er inklui karreta at maka para iha sorin.

Nune’e mós bainhira haree husi parte Oeste iha konstrusaun uma susun ka tuir-tuir malu ne’ebé pelu menus medida 6 metru kada espasu ida, maibé taka metin lahatene saida maka iha laran. Husi parte norte estrada tama nian di’ak no husi parte súl mamuk duut maka moris nakonu iha kotuk.

Enkuantu, haree husi konstrusaun klaran edifísiu boot baihira jornalista Timor Post konfirma pesoál seguransa, ne’ebé la-temi nia identidade hatete, armazena ne’e xina maka aluga sei utiliza hela.

“Fatin ida ne’e própriu estadu nian, Xina maka agora daudauk aluga hodi utiliza hela,” dehan Pesoál Seguransa, ne’ebé la-temi nia identidade dada lia ho Timor Post, iha armazena Bebora, Sesta (25/06).

Maibé husi observasaun Timor Post haree katak espasu iha armazena testil Be-bora ne’e uma boot iha klaran ne’e maka Xineza sira aluga, ida más uma aat sira sorin parte leste ne’e maka mamuk maibé la-merese atu utiliza ona.

Signifika fatin ne’ebé maka Governu liu husi Ministériu Justisa fó ba grupu arte moris ne’e laiha kondisaun para joven sira arte moris ne’e hodi halo atividade artezanatu.

Enkuantu antes ne’e Timor Post mós halo observasaun ba atuál Arte Moris Beto suku Madohi haree, dezde semana kotuk to’o mai Sesta (25/06), konsellu veteranu sira mobiliza forsa sira kontinua hamoos espasu sira iha arte Moris para atu hadi’a hodi konstroi ba edifísiu Konsellu Veteranu nian.

Antes ne’e mós, Prezidente Konsellu Veteranus Vidal de Jesus “Riak Leman” hatete, konforme informasaun ne’ebé mak mai husi Ministériu Justisa katak, Ministériu atu lori arte moris sira ba armazena Bé-bora nian, maibé Arte Moris sira mak lakohi.
Tanba Konsellu Veteranu obriga grupu arte moris sira tenke koopera para atu buka solusaun, se lae sei halo despaxu administrative sai tenke sai ho pasiénsia, ida ne’e ladún fó valor di’ak hanesan aman veteranu sira imajen.

“konforme ami ba hasoru malu ho sua exelénsia Ministru Justisa, dehan katak lori sira ba haree armazena iha Bé-bora, agora sira lakohi fali, armazena iha GMN nia kotuk sira lakohi,” dehan Prezidente KV, Riak Leman, antes ne’e ba Timor Post iha Tersa (22/06).

“Agora únika solusaun maka ne’e ita koopera malu ou despaxu administrativu tama ita tenke sai ho pasiénsia,” Riak Leman hatete.

Entaun edifísiu daudauk ne’e grupu Arte Moris mak utiliza ona iha tinan barak nia laran, bainhira KV nia preokupasaun ne’e sai hafoin hasoru malu ho prezidente repúblika, más arte moris sira dehan katak prontu koopera.
Nia subliña, problema maka ne’e Arte Moris hela sasán estadu nian, rai estadu, uma estadu, tanba ne’e mak KV husu tenke hanoin ida ne’e bainhira estadu presiza hala’o servisu ruma iha ne’e tenke husik ba estadu atu utiliza.

Tuir loloos Arte Moris ne’ebé hatene ona propriedade estadu ne’e hatene ona buka fatin rasik, tanba ne’e mak sei entrega ba Sekretáriu Estadu Arte no Kultura maka iha kompeténsia atu rezolve problema arte moris nian.

Antes ne’e mós, Diretór Joven Kriativu Arte Moris, Ili-watu Dana-bere, hatete konsellu veteranu sira laiha liña koordenasaun ho joven kriativu halibur malu iha Arte Moris, más Aman veteranu sira ba halo tiha depois maka oan sira iha arte moris ba buka tuir mak hatene katak edifísiu Arte Moris ne’ebé kuaze tinan 20 resin utiliza ne’e atu konstroi ba edifísiu Konsellu Veteranu Timor-Leste nian.

“Infelizmente husi Inisia to’o agora liña koordenasaun loloos laiha, situasaun sira ne’e akontese, akontese de’it depois ami maka buka tuir informasaun,” Diretór Arte Moris, Ili-watu, hatete.

Nia afirma, iha tinan kotuk bainhira aman Veteranu sira halo nonook de’it depois mak derijente Arte Moris rasik mak ba buka Sekretáriu Estadu Komunikasaun Sosiál mak organiza diálogu entre Arte Moris, Sekretáriu Arte no Kultura ho Teras Propriedade hodi indika fatin ida iha Bebora ne’ebé mak la-própriu akumula joven sira iha arte moris entaun Arte Moris hato’o hikas fali maibé komunikasaun kotu kedas iha momentu ne’ebá.

Entaun asaun konsellu veteranu sira utiliza forsa F-FDTL tun mai hamoos edifísiu Arte Moris ne’e mós hanesan asaun presaun ida ba joven lubuk ida ne’ebé mak aprende iha arte moris ho talentu oioin ne’ebé durante ukun an hatudu ona obra barak tantu iha rai laran no mós iha rai li’ur.

“Ami hakfodak sesta semana kotuk ekipa konsellu veteranu utiliza forsa F-FDTL mai hamoos fila fali, saida mak ami sei halo tuir mai, iha tempu badak ami koko hasoru Primeiru Ministru para hetan klarifikasaun uitoan ami nia destinu ne’e atu la’o oinsá,” nia esplika.

“Asaun daudauk ne’e mak fó presaun, iha pasadu ladún fó afetadu, daudaun fízikamente halo iha ami nia area ne’e mak fó presaun maka’as uitoan, maibé ami la-hakfodak ho situasaun ida ne’e, ami hanoin neineik sei iha solusaun ba situasaun sira ne’e,” katak Ili-watu.
Diretór Arte Moris, la-husu buat barak, maibé oinsá governu fasilita espasu ruma para sira kontinua formasaun joven sira Timoroan sira ne’ebé mak hakarak aprende talentu arte moris nian, espasu ba estúdiu toka, fotografia, teatru ne’ebé mak grupu Arte Moris dezeña hotu ona para atu aprezenta ba Primeiru Ministru.(f10)