Eskola hamutuk 30 iha Baukau Loke Konta Bankária ba PKRIE

by -354 views
ESJ Númeru 02 Vila Nova Baucau. Foto Espesial

BAUKAU (Timor Post)—Eskola hamutuk tolu-nulu (30) ne’ebé hetan benefísiu husi implementasaun Programa Konstrusaun Reabilitasaun no Infraestrutura Edukativa (PKRIE) hahú loke ona sira nia konta bankária, atu halo fasil prosesu transferénsia osan husi Ministériu Edukasaun Juventude no Desportu (MEJD).

“Ita nia grupu komunitáriu ba projetu tolu ne’ebé hodi bainhira asina ona kontratu ohin ninia prezidente grupu, tezoureiru ho consultant husi ministériu edukasaun hahú ona loke konta bankária, kuandu tempu besik ministériu koloka ona osan ba sira nia konta bankária ida-idak sira komesa hahú ona servisu konstrusaun edifísiu foun no reabilitasaun sala eskola ba eskola nivel pre-eskolár to’o tékniku vokasionál”, dehan diretór SME Baukau, Augusto Ornai Ximenes ba Timor Post iha nia knar fatin, Segunda feira (18/10).

Nia esplika, bainhira orsamentu husi ministériu tama ona ba grupu komunitaria ida-idak nia konta bankária sira komesa hahú ona halo konstrusaun no reabilitasaun tanba durasaun tempu servisu hahú tinan ne’e to’o tinan oin 2022.

Nia afirma orsamentu ba programa konstrusaun no reabilitasaun infraestrutura edukativu tuir sala aula eskola, tanba pre eskolár sala rua, ensinu bázika sala tolu to’o sala neen ho nia kustu mínimu trinta e seis mill no másimu sentu setenta mill dolares amerikanu ($,36,000.00) to’o ($, 170,000.00).

“Orsamentu ne’ebé ita nia ministériu aloka tuir sala aula eskola ida-idak nian tanba programa ne’e hahú husi eskola pre-eskolár sala rua ho eskritóriu, ensinu bázika balun sala tolu no sala hat, barak liu mak eskola sekundária 02 vila-nova mak hetan sala neen”, Augusto hatete.

Iha tempu hanesan, reprezentante grupu komunitáriu ne’ebé lakohi fó sai nia naran hateten, ninia parte loke ona konta bankária no hein de’it bainhira mak ministériu transfer osan mai pronto hala’o servisu.

“Ami husi eskola sanulu mak ohin hahú loke ona ami nia konta bankária, tanba ne’e ami hein de’it bainhira osan tama 0na ami pronto hala’o servisu” dehan reprezentante ne’e. (gut)

No More Posts Available.

No more pages to load.