“Éroi Dalan Ninin”

by -134 views
Poetiza Alexandra Tilman

Poetiza Alexandra Tilman

Tuir dalan ninin ha´u matan borus
Kamat hetan labarik ain-tanan kahoer
Lakon xilelus husi ain-fatin be laiha fatin
Lakon esperansa rihun ba rihun iha nia moris
Lakon mós nia mehi ba futuru loron be naruk.
Mehi…mehi dalan ninin husi labarik kbi´it laek
Mehi dalan ninin husi labarik be lakon domin
Lakon domin murak husi aman inan domin-nain.
Mehi…mehi…mehi
Mehi husi fuan be malirin, mehi husi tanis no halerik
Mehi tanba susar no terus
mak mai hafalun nia isin lolon be sei ki´ik
Mehi…Mehi ba etu bikan ida be hamaluk ho mata ween.
Mehi….
Mehi ba inan ninia hamnasa furak
Mehi ba aman ninia kontente husi ibun tutun
Mehi naruk atu halibur iha kalan hakmatek
Mehi ba mehi katak loron aban sei sai realidade ka Oinsa?
Mehi…
Mehi husi éroi dala-ninin be nakohu ho kro´at no tarak
Tarak ba fuan kmook be dala wain taka liman hamulak
Be dala wain fiar-an laran moos maibé santanas
Be dala wain hamnasa midar koitadu,
Maibé laran dodok no makerek
Makerek ba emar ki´ik, ki´ak no la´ek
Iha dalan no loron nia si´ak
Iha dalan-dalan, éroi dalan-ninin
Be lakon nia hamnasa no kontenti
Nusi emar-emar be dehan laran-moos no aas ba!!!

Metiaut, 21/03/2021

oras : 01:20

No More Posts Available.

No more pages to load.