Entre Horta-Alexandrino Sei Kompete Xanana Nia Bensa Iha Konferensia CNRT

by -4.239 views
Eis Sekretáriu Estadu Protesaun Sivíl (SEPS), Alexandrino Xavier de Araújo nu'udar kadidatu ida ne'ebé sei hetan bensaun hosi Xanana Gusmão hodi kandidata aan ba Prezidente Repúblika, dada lia hela ho kongresista CNRT nian, Domingu (23/01/2022). (Foto Timor Post/Jaime Pires)

(Reportajén Jaime Pires- Jeremias Soares/Editora Suzana Cardoso)

DILI (Timor Post) – Partidu CNRT, lideradu husi Kay Rala Xanana Gusmão, sei hili ka fó bensa ba Premiadu Nobel da Paz, José Ramos Horta no Eis Sekretáriu Estadu Protesaun Sivíl (SEPS), Alexandrino Xavier de Araújo ba kandidatu Eleisaun Prezidensiál, 2022-2027.

Tuir informasaun ne’ebé Timor Post asesu husi Konferensia Nasionál partidu CNRT iha Salaun OKA Osindo, Domingu (23/01) hodi deside ema ida atu reprezentante partidu CNRT ba compete iha eleisaun prezidensiál ne’e katak, sei iha eleisaun hodi deside José Ramos Horta ka Eis Sekretáriu Estadu Protesaun Sivíl (SEPS), Alexandrino Xavier de Araújo maka reprezenta Partidu CNRT.

Eis Sekretáriu Estadu Protesaun Sivíl (SEPS), Alexandrino Xavier de Araújo

Antes ne’e Primiadu Nobel da Paz, José Ramos Horta, deklara ona iha Salaun, Katedral katak, ba nia kandidatura ne’e sei hamutuk ho Líder Nasionál Kay Rala Xanana Gusmão ho Partidu CNRT.

Maibé iha konferensia Nasionál ne’e, derepente mosu naran Alexandrino Xavier de Araújo maka sei compete kombepe iha eleisaun prezidensiál tanba, nia mós durante ne’e lidera movimentu barak hodi fó apoiu ba partidu CNRT.

Konferensia ne’e loke ofisial husi Prezidete Partidu CNRT, Kay Rala Xanana Gusmão. Konferensia Nasionál ne’e partisipa husi delegadu estrutura munisipiu-12 no RAEOA inklui konseleiru munisipiu. Delegadu CDN Munisipiu na’in-2. Delegadu Estrutura Post Administrativu na’in-6 inklui ona konseleiru Postu Administrativu. Delegadu kada nurep na’in-2, kompostu husi koordenador ho sekreraria.

Antes ne’e, Prezidente Partidu CNRT to’o iha fatin seremónia tuku 8:30 OTL, simu ho dansa kultura no hakfolik ho tais, molok hakat tama ba fatin konferensia. Iha salaun laran Xanana simu ho viva husi konfrensista sira. “Viva Maun Boot Kay Rala Xanana Gusmão, Vivaaaa.”

Tuir relatoriu ne’ebe hato’o husi Prezidente Komisaun Organizador, Virgílio Smtih, katak ema ne’ebe partisipa iha konfrensia nasional ne’e, hodi hakonu salaun laran Oka Rudal hamutuk na’in-1666.

Molok konfrensia hahu, ba dahuluk protokolu lei sai ajenda ho nia sekuensia sira, hafoin ne’e hahu ho reza, kontinua kedan ho Inu Nasional, inklui minutu silensiu ne’ebé prezide husi Prezidente Partidu, no ikus liu taka ho Inu Partidu.

Molok atu hahu konfrensia, partesipante no media sira tenke husik hela fatin konfrensia, tanba internalmente partidu sei deside kandidatu PR, hafoin ne’e, tuir ajenda oras tuku 18:30 foin halo konferensia imprensa ho média sira, para fo sai rezultadu konferensia nian ba publiku.

Konvidadu ne’ebe Marka prezensa iha konferensia ne’e kompostu husi Prezidente CNE ho estrutura, José Luís Guterres, Madre Guilhermina Marcal, Prezidente Administrasaun Konsellu Kombatente Libertasaun Nasional, Vida de Jesus ‘Riak Leman’ inklui sira seluk. (Lee Notísia seluk iha Jornál Timor Post/Asesu You Tube Timor Post)

No More Posts Available.

No more pages to load.