Embaixadór Saharawi Agradese Ba Timor Leste

by -982 views
Prezidenti da Repúblika, Francisco Guterres Luolo entrega tais ba Embaixador Mohamed Alana Badi.Foto TP/MPR

(Reportajen Venidora Oliveira /Editor Rosa Garcia)

DILI (Timor Post) – Embaixadór Repúblika Demokrátika Árabe Saha Rawi ba Timor-Leste, Mohamed Slama Badi agradese ba Estadu Timor-Leste nia apoiu tomak no solidariedade ba sira-nia luta ba ukun rasik-an.

Hafoin audiénsia ho Prezidente Repúblika, Francisco Guterres Lú Olo, Embaixadór Mohamed Slama Badi hateten, nia hanesan ema estranjeiru, maibé daudaun nee sente hanesan maubere oan ida.

Hau mai iha Maiu 2010, hanesan ema estranjeiru, maibé agora depois 11 fila ba hau-nia rai nuudar ema timoroan ho domin, hanesan maubere oan ida. Hau simu apoiu tomak husi nivel hotu-hotu, hahú kedas husi Prezidente Repúblika, Governu, Ministériu Negósiu Estranjeiru, partidu polítiku, sosiedade sivíl, tipu apoiu hotu-hotu no solidariedade, nia hatete, iha palasio prezidensiál, Tersa (27/04)

Nasaun rua sei kontinua hametin relasaun fraternal no manifesta vontade polítika atu serbí ba bem-estar Povu nian.

Embaixadór hateten katak Povu Timor-Leste hatudu Povu neebé moris ho valores no prinsípiu no hatene saida mak sofrimentu no luta hodi hetan ninian direitu. Timor-Leste riku ho nia istória luta ba independénsia ninian.

Hau sente triste no ho orgullu. Sente parte husi Povu ida nee, hau fila hanesan Maubere ida, nakonu ho sentiment no esperiénsia akumuladu. Povu kiik ho prinsípiu no valores boot. Hamriik tuir dalan too hetan progresu maski hetan difikuldade ekonómiku, krize, dezastre natural.

Povu ida nee hatudu husi loron ba loron sai Povu boot ida, Embaixadór nee apresia.
Timor-Leste nuudar Estadu neebé rekoñese Repúblika Demokrátika Árabe Saharawi nuudar nasaun no loke nia reprezentasaun diplomátika iha Dili. Estadu Timor-Leste apoiu no solidariza luta Povu Saharawi atu hetan ninian independénsia.(Lee Notisia Seluk Iha Jornál Timor Post)

No More Posts Available.

No more pages to load.