Embaixada Tailándia Apoia Rihun $2.900 ba Fundasaun Alola

by -228 views
Bandeira Tailándia

DILI (Timor Post)—Atu tau matan ba inan faluk inklui inan kbiit laek sira ne’ebé mak marjinalizadu, ne’ebé mak ema ladun tau matan durante ne’e, Embaixada Tailándia apoia fundu ho montante rihun $2.900 ba Fundasaun Alola (FA).

Diretór interinu Fundasaun Alola, José Sabino Ximenes, hatete Embaixada Tailándia nu’udar parseiru Fundasaun Alola nian desde tinan 2014 to’o agora, ne’ebé sempre ajuda FA.

“Sei kometimentu nafatin. Iha tinan ne’e Embaixada Tailándia fó apoiu ba Fundasaun Alola ho montante $2.900,” Diretór interinu Fundasaun Alola, José Sabino Ximenes, ko’alia ba jornalista sira iha Embaixada Tailándia Faról-Dili, Kuarta (29/09).

“Apoiu ida ne’e, atu fó ajuda ba inan faluk, inan kbiit la’ek sira ne’ebé marjinalizadu, sira ne’ebé la asesu ba oportunidade hotu-hotu, liu-liu ba informasaun no merkadu, sira ne’e mak Fundasaun Alola fó prioridade,” nia hatutan.

Fundu ne’e la’ós atu fahe de’it ba komunidade sira, maibé nia dehan, uza hodi fó kapasitasaun, atu hasa’e sira nia abilidade no liuhusi abilidade ida ne’e, bele hadi’a no buka sira nia moris, liuliu ba iha parte ekonomia nia, sira bele hetan osan uitoan bele hadi’a sira nia uma laran no liuliu bele responde ba sira nia nesesidade uma laran.

“Durante 2014 ami hetan fundus hosi Thai-Embassy, fundu ki’ikoan maizu menus 30.000 mil, dala ruma tun fali ba $2.900 maibé fundus ki’ik ne’e iha signifikadu tanba fundus ne’e bain-bain ami fó kapasitasaun ba feto sira, liuliu ba abilidade negósiu no hadi’a sira nia produtu tais,” nia hatete.

Aleinde ne’e, nia afirma, Fundasaun Alola mós fó formasaun ba grupu sira kona-ba produsaun mina nu’u virjen, sira nia produtu lokal sira ne’e, liga fali ba merkadu liuliu ba tempu férias.

Iha tinan ida, ferias dala rua Páskua no Natal Fundasaun Alola konvida sira  mai partisipa iha feira ne’e no mós konvida sosa na’in sira atu mai sosa sira nia produtu.

“Bainhira férias ne’e remata, ami sukat sira nia rendimentu kada grupu ida, nia bele hetan rendimentu menus liu $500, sa’e liu dala ruma to’o $2.000 kada ema ida  no osan sira ne’e lori fali ba uma hodi sosa ai-han no nesesidade uma laran, soma sira nia rendimentu ba tinan ida bele hetan $ 20.000 to’o $ 30.000, husi fundus ki’ik ida ne’e bele fó benefísiu ba sira,” nia katak.

Portantu, maski iha situasaun covid, maibé Fundasaun Alola iha planu atu kria merkadu ida, para feto sira bele lori sira nia produtu ne’e mai merkadu, para Fundasaun Alola  konvida sosa na’in sira mai sosa, atu ne’e bele hetan rendimentu uitoan no bele sustenta sira nia nesesidade uma laran.

“Osan ne’ebé mak fó mai Fundasaun Alola ikus ami halo relatóriu hatudu rezultadu ba sira, ema hira mak hetan benefísiu, ami planu iha tinan ida ne’e, ami sei kria tan sira, ami konvida grupu neen nulu resin, hosi neen nulu resin ne’e, ema na’in rua nulu no ita bele dehan neen nulu ne’e ema hira mak hetan benefísiu,” nia hatete.

Sempre kongratula Embaixada Tailándia, ba sira nia kometimentu aas, sira kometimentu la’os atu apoiu de’it, sira mós iha kometimentu seluk, hanesan fó  kapasitasaun ba staff no iha  oportunidade formasaun ruma sira konvida staff Alola ninia hodi partisipa atu aprende. (MJ2)

No More Posts Available.

No more pages to load.