Embaixada Korea Ajuda Livru 90.108 Ba Terseiru Siklu

by -304 views
Embaixadór Koreia mai Timor-Leste (TL), Kim Jeong Ho

DILI (Timor Post) – Tanba mudansa global hosi pandemia  Covid-19 hodi  obriga halo ajustamentu ba sistema edukasaun iha mundu maka Embaixada Korea liu ajénsia COICA fo tulun livru 90.108 ba nivel estudante terseiru siklu.

Hafoin remata serimónia simu no entrega livru hirak ne’e, Segunda, (25/10), ba Jornalista, Embaixadór Koreia mai Timor-Leste (TL), Kim Jeong Ho hateten, livru ho valor osan maize menus U$2.4 juta ne’ebé tuir loloos distribui ona iha tinan 2014 to’o tinan 2018 ne’e fó liu hosi COICA no implementa hosi UNESCO.

“Livru balun sei entrega iha tinan 2022 ba estudante hirak ne’ebé agora estuda online. Tuir planu kada estudante hotu-hotu tenke iha livru para estuda ho di’ak liután iha mudansa global  ne’ebé daudaun ne’e akontese,”  esplika Embaixadór Kim.

Nia promete Governu Korea sei nafatin ajuda  TL iha setór edukasaun liu-liu eskola online sira para fornese livru hirak ne’e.

“Ami nafatin servisu hamutuk ho Ministériu Edukasaun, Juventude no Desportu (MEJD) ho UNESCO atu nafatin distribui livru hodi halo dijitalizasaun ba iha arkivu sira ne’ebé agora daudaun iha COICA apoiu hela atu halo dijitalizasaun,” esplika  Embaixadór Kim.

Antes ne’e Ministru MEJD, Armindo Maia  agradese ba apoiu ne’ebé oferese mai edukasaun iha Timor-Leste boot tebetebes. Tanba livru sai prioridade boot ba iha prosesu aprendizajen. No livru hirak sei utiliza ba siénsia no matemátika iha terseiru siklu.

“To’o agora Ministériu Edukasaun sidauk bele halo livru. Espera kada alunu ida tenke iha nia livru rasik para bele estuda iha uma. Tanba pandemia Covid-19  halo asesu internet moos susar. Dala barak eletrisidade moos labele. Entaun ho livru ne’e, labarik sira bele estuda iha uma,” Armindo esplika.(mj10)

No More Posts Available.

No more pages to load.