Embaixada Korea Demonstra Aihan Lokal iha Dili, “Hakarak Timoroan Sira Konsumu”

by -1.594 views
Imajen ne'e hatudu atividade demonstrasaun aihan lokal iha Embaixada Kore Sul iha Dili. Foto TP Cardenio Alves

Jornalista Cardenio Alves / Editór Noémio Falcão

Dili (Timor Post)—Embaixada Korea Sul demonstra aihan lokal rai ne’e nian iha Dili ho intensaun atu oferese ba timoroan sira konsumu hodi bele fornese vitamina di’ak ba ema nia isin.

Atividade ne’e hala’o iha Edefísiu Embaixada Korea Sul iha Práia dos Coquieros, Dili, Kinta (02/12/2021).

Embaixadór Kim Jeon-Ho ba Jornalista sira hatete, aihan lokal Korea nian hanaran Kimchi ne’e sai hanesan hahan tradisionál ba koreanu sira.

“Objetivu ohin halo ai-han Kimchi atu fahe hahan tradisional Korea nian, ne’ebé mak iha vitamina di’ak ba ema timoroan sira nia saúde,” Kim Jeon-Ho subliña.

Kim Jeon-Ho haktuir, iha Korea iha tempu uluk kuandu aihan laiha, sira nia laran metin ba Kimchi tanba fó moris di’ak no aumenta vitamina ba isin.

“Korea bainhira hahan laiha, bele produz ai-han Kimchi ida ne’e hodi  aguenta ba moris, no Kimchi ne’e rasik sai hanesan produtu kultural ba korea, nune’e bele promove hahan ida ne’e mai iha Timor Leste,” Kim Jeon-Ho hatutan.

Ai-han Kimchi, uza produtu lokal sira hanesan repollu ho bumbu oioin no mistura ho mollu ikan, pimento rahun, jus pera/pear, jus lis bombai, lis mutin, masin midar no foos belit.

Partisipa iha atividade demonstrasaun ne’e inklui espoza Primeiru Ministru Taur Matan Ruak, Isabel da Costa Fereira.

No More Posts Available.

No more pages to load.