Ema Na’in-34 Baku Fila ho Karreta iha Maubisse

by -369 views

Jornalista Luis Casimiro Lopes / Editór Noémio Falcão

Maubisse (Timor Post)—Ema na’in-16 kanek todan no na’in-18 kanek kmaan iha asidente trafegu ho karreta iha Suku Hohrai-Kiik, Postu Administrativu Maubisse, Munisípiu Ainaro.

Karreta vaskolante ho númeru matríkula 54-261 TL baku fila iha loron Kinta (02/09/2021) maizumenus tuku 9 dader.

Komandante Polísia Komandu Munisípiu Ainaro, Superintendente Justinho Menezes haktuir,vítima sira kompostu husi feto na’in-9, mane na’in-25. Objetivu viajen família sira lori feto foun husi husi Aldeia Datiri, Suku Mulo, Postu Hatubuiliko, Munisípiu Ainaroatu ba Postu Administrativu Letefoho-Munisípiu Ermera.

“Motivu husi asidente ne’e tanba kondutor kondus karreta ho velosidade maka’as ikus mai la dumina volante nune’e karreta soke deker ka bareira iha estrada ninin hodi rezulta karreta baku fila iha estrada ninin kuaze metru rua,” Komandante Justinho via telefone ba Timor Post.

Vítima sira hetan kedas evakuasaun ba ositál referál Maubisse hodi hetan asisténsia médiku

Molok hakotu nia sublina, vitima nain 16 ne’ebé kanek grave oras ne’e dadaun tuir mediku katak sira labele book a’an inklui han no hemu  no posibilidade transfere ba Hospital Nasional Guidu Valadares (HNGV), Dili.

No More Posts Available.

No more pages to load.