Timorpost.com I ERMERA-Prezidente Partidu Kongresu Nasionál Rekonstrusaun Timor (CNRT), Kay Rala Xanana Gusmão, bolu atensaun ba Komisaun Nasional Eleisaun (CNE sigla portugés), relasiona ho militante husi partidu balun tuda kanek militante partidu CNRT, hafoin fila husi kampaña aberta partidu CNRT nian ne’ebé realiza iha kampu futebo Nino Conis Santana Glenu, Tersa (09/05).
Xanana koloka kestaun ne’e iha ambitu mini kampaña partidu CNRT nian, ne’ebé realiza iha postu administrativu Hatulia-A, Kuarta (10/05).
“Agora ne’e ita iha ona kazu barak ne’ebé ita hatama ba CNE, bolu ba CNE atu dehan imi halo ka lae? Horisehik iha Ermera, ita-nia maluk sira sa’e mai, iha Nunu Tali nian ema tuda. Iha Vikeke harahun uma no tuda, iha Ossu no mós fatin seluk, ne’e duni imi Hatulia, husu ba imi hotu liuliu ba joven sira, atu kria ambiente dame to dia 21 Maiu manan tiha mós ambiente dame nafatin”, Xanana alerta.
Xanana husu ba militante, simpatizante no apiante sira, atu labele simu provokasaun, no labele provoka ema, para hatudu katak militante husi partidu CNRT nian iha maturidade politika.
“Partidu ida ne’e hakarak eduka nia ema atu haree liubá saida mak ita-nia rain presiza no ema ida bele kontribui, la’ós atu baku malu no estraga malu”, Xanana dehan.
“Ambiente dame, para hatudu katak iha ita-nia partidu hanorin ita atu sai sidadaun di’ak, tanba ita baku malu beibeik, dezenvolvimentu sei la mosu, imi sei laiha tempu atu tuur hamutuk hodi diskute problema rai ne’e nian, atu bele partisipa iha dezenvolvimentu rai ne’e nian”, Prezidente Partidu CNRT ne’e apela.
Nune’e mós Segundu Vise Prezidente Partidu CNRT, Gil da Costa ‘Oan Soru’ mós husu ba CNE atu toma atensaun ba membru deputadu no membru governu balun husi partidu FRETILIN nian, ne’ebé toba de’it iha munisípiu Ermera, hodi fahe osan, mangeira, foos, fiu eletrisidade no kalen tahan ba komunidade sira iha ambitu kampaña eleitoral ne’e.
“Atu apela ba CNE ne’ebé la’o tau matan hela ba ami sira politika ne’e, maibé ha’u haree ita boot sira-nia servisu la masimu tiha ona, karik ita boot sira halis, ko’alia loloos de’it. Ami CNRT koko koopera ho instituisaun estadu sira, maibé instituisaun sira ne’ebé kompetente, la asume ninia kna’ar loloos tuir regra ne’ebé iha”, nia deklara.
Entretantu, iha mini kampaña ne’e hetan fiskalizasaun husi Komisaun Nasional Eleisaun, inklui hetan seguransa masimu husi Polisia Nasional Timor-Leste komandu munisípiu Ermera.
3,480 total views, 3 views today
