Eletrisidade Laiha, Pesoál Saúde Sentru Saúde Rairobo Uza Lámpada Atende Pasiente

by -617 views

Timor Post (09/06/2020—Reprezentante povu iha uma fukun parlamentu nasionál tersa (09/06) preokupa liña eletrisidade no kanalizasaun bee moos ne’ebé to’o oras ne’e sidauk kobre iha territóriu timor laran.

Deputadu Faviao de Oliveira (FRETILIN) husu urjente ba governu atu tau atensaun liña eletrisidade ba sentru saúde Suku Rairobo Munisípiu Bobonaru, tanba iha kontaktu eleitorál hare pesoál saúde  uza de’it lámpada maka hodi halo atendimentu ba pasiente iha tempu kalan tanba la iha kanál eletrisidade.

“Ha’u hakarak aborda asuntu importante balun iha nee. Bazeia ba kontaktu eleitorál Sentru Saúde  suku rai robó-bobonaro eletrisidade sai preokupasaun, tanba sentru nee tinan tolu ona la iha asesu eletrisidade.  Impaktu maka ne’e bainhira inan feton sira ne’ebé tuur ahi, inan feton sira sira lori deit lampra maka leno hodi ajuda. Tanba ne’e maka ha’u husu ba governu, se bele se karik urjente bele atende jeradór, para bele ajuda ita nia postu sira iha fatin hotu-hotu, ne’ebé akontese problema hanesan”, afirma deputadu Fabião, iha sala plenáriu PN, tersa.

Nia tenik Governu bele arranja urjentemente kona bá jeradór sira fó ba postu sira ne’ebé izoladu atu ajuda médiku sira iha ne’ebá se lae sira (mediku) labele halo buat ida.

Kona bá  bee mós. Fabião  hatudu agora Governu agora halo hela sosializasaun fase liman, maibé fatin balun bee la iha.

“Hanesan eskola no sentru saúde sira bee moos la iha  entaun halo nusa maka Governu halo bele kontratu karreta Tenke sira nee, ba tau iha postu no eskola sira, para estudante ho pasiente bele fase liman hodi hadook ann husi virus ne’ebé akontese iha rai laran”, hatutan deputadu refere.

Parte seluk nia apela ba AIFAESA (Autoridade Inspesaun no Fiskaliza saun ba Atividade Ekonómiku) halo kontrolu urjente ba supermerkadu labele fa’an sasán liu prazu tanba nesesidade kompra sei sa’e hafoin komunidade sira simu subsídiu.

“Daudaun nesesidade kompras sei bo’ot tanba nee husu ba alfaesa atu halo ona inspesaun ba sasán sira ne’ebé liu prazu, tanba ai-han  sira ne’ebé nesidade pa povu konsumu liu prazu sira bele hasai fali povu la hatene bele hola fali, nia impaktu ba povu komunidade nia saúde. Tanba nee alfasea bele rigorozu tanba ita nia komunidade iha suku nee sira la hatene sira simu osan sira ba hola supermi, urjente atu hare” hakotu deputadu ne’e.

Hatán ba preokupasaun ne’e Sekretáriu Estadu Komunikasaun Sosial, nu’udar mos porta vos do Governu, Mericio Akara hateten, preokupasaun hirak ne’e nia rejistu no sei hato’o ba Primeiru Ministru no Ministru relevante.

“Preokupasaun, komentáriu ne’ebé maka Na’i deputadu sira hato’o ami rejista hotu ona, sei transmite Primeiru Ministru ho ministru relevante sira atu fó atensaun no fó informasaun eskrita, detail. Informasaun balun iha ne’e kategoria urjente sei tau atensaun imediata.  Hanesan pagamentu subsídiu sei akompaña, iha ona orintesaun karik iha terenu enfrenta problema ka preokupasaun sei hadi’a kedas.  Ita tenke rekoñese iha prosesu laran iha difikuldade, problema, tanba ne’e husu para informa  hodi halo intervensaun” hatete Mericio.

Jornalista: Mariano Martins

No More Posts Available.

No more pages to load.