DILI (timorpost.com) — Sarani sira hosi Igreja São Jose Ai-mutin hela de’it ho esperansa atu bele halibur malu iha misa Domingu-Domingu nian iha igreja Ai-mutin, tanba obra ba konstrusaun ne’e seidauk termina to’o ohin loron.
Diretór Ezekutivu SASCAS, Edvin Soares Noronha, hatete, SASCAS fó apoiu orsamentu ba konstrusaun Igreja Ai-mutin, aloka hotu ona iha tinan 2021, maibé to’o agora seidauk konklui obra ne’e.
“SASCAS agora laiha planu atu apoiu tan orsamentu ba konstrusaun Igreja Ai-mutin, tanba orsamentu ne’ebé mak prevee ba obra ne’e ho total millaun 3 USD, agora laiha orsamentu espesífiku ba konstrusaun ne’e,” Edvin hateten ba Timor Post iha edifísiu Ministériu Finansas Ai-tarak Laran, Tersa (01/08).
Tuir nia, SASCAS aloka ona orsamentu ba obra refere, bazeia rezolusaun Konsellu Ministru, momentu ne’ebá aprova ho montante orsamentu millaun 3 USD.
Governu liuhosi SACSAS laiha tan orsamentu espesífiku ba konstrusaun Igreja Parókia São José Ai-mutin ho razaun katak, entrega ona osan millaun 3 USD ba Konferénsia Episkopál Timorense (CET-sigla Portugés) mak atu jere orsamentál ne’e.
Nia hatete, konstrusaun obra ne’e ho total orsamentu millaun 3 USD, maibé ninia prosesu konstrusaun foin mak atinji porsentu 90, agora, restante hosi obra ne’e, orasida Igreja rasik mak buka dalan atu bele rezolve.
“Tinan ne’e, ami laiha rekomendasaun ba Governu Konstitusionál Dasia, hodi haree ba konstrusaun Igreja Ai-mutin, tanba Uma-kreda nia atinjementu foin porsentu 90, ne’ebé ami hein tan to’o konklui”, nia hateten.
Maski la apoiu tan orsamentu, maibé mak haree fali posibilidade ba oin ne’e halo nusa, tanba obra ne’e hahú iha 2015 pagamentu fazeadamente no konklui iha 2021 signifika pagamentu millaun 3 USD ne’e porsentu 100 (100%).
Momentu fó apoiu ba konstrusaun uma-kreda, sempre akompaña no halo monitorizasaun tinan-tinan, tanba pagamentu hotu-hotu bazeia ba apresiasaun hosi Ajénsia Dezenvolvimentu Nasionál (ADN) nian.
Nia dehan, ADN mak fó apresiasaun tékniku, dehan atinji ona hira, depois SASCAS halo pagamentu tuir ida ne’e, dalan seluk mak atu apoiu ne’e, SASCAS husu konklui tiha lai ho millaun 3 USD ne’e.
Diretór ne’e hatutan, SASCAS apoiu orsamentu ba Igreja Ai-mutin hotu ona, ikus liu ba konta bankária CET nian iha tinan 2021. Tanba ne’e, sira mak tenke halo koordenasaun ho Igreja no ADN atu haree konstrusaun tuir atinjimentu.
Nia rekomenda ba Igreja Parókia Ai-mutin katak, sira mak tenke halo ezersisiu, atu hetan osan, hodi bele kompleta konstrusaun Igreja Ai-mutin, tanba sarani barak mak hein hela obra refere bainhira mak remata.
Kada tinan, Governu sempre aloka orsamentu ba Igreja Katólika liuhusi CET, entaun Igreja Ai-mutin bele halo negosiasaun ho CET, tanba CET iha informasaun di’ak ba obra ida ne’e. No CET hein hela rezultadu ikus husi orsamentál ne’e.
Entretantu, Pro-Prezidente Konferénsia Episkopál Timorense (CET-sigla Portugés), Dom Virgílio Kardeál do Carmo da Silva, SDB, husu ba Gabinete Apoiu Sosiedade Sivíl ne’ebé mak agora transforma ona ba Servisu Apoiu ba Sosiedade Sivíl no Auditoria Sosiál (SASCAS) no Ajénsia Dezenvolvimentu Nasionál (ADN) atu halo fiskalizasaun ba progresu konstrusaun Igreja Ai-mutin ne’ebé daudaun paradu hela.
“Konstrusaun igreja ne’e ho millaun 3 USD. Agora sei falta millaun 1 USD resin atu termina, más osan millaun 1 USD ne’e atu foti tan hosi ne’ebé mai, ha’u mós seidauk brani atu loke ibun”, Dom Virgílio hateten iha Ministériu Finansas, Kinta (23/03/2023).
Dom Virgílio hatete, molok igreja lokál atu halo intervensaun ruma ba ida ne’e, hakarak Gabinete Apoiu Sosiedade Sivíl no ADN tenke fiskaliza uluk katak, osan millaun 3 USD ne’e gasta oinsá ona no osan ne’e gasta tuir duni dalan, entaun bele buka fali osan husi fatin seluk mak foin bele kontinua.
“Konstrusaun Igreja Ai-mutin ne’e antes ha’u tama mai nu’udar bispu, ha’u tama mai iha Dili iha fulan Marsu 2016. No iha 2015 sira asina tiha ona akordu sira ne’e hotu no hala’o tiha ona. Dioseze Dili labele intervein diretamente, tanba hakarak haree uluk lai. Prosesu osan ne’e mai la liuhosi subvensaun ida agora ne’e, maibé diretamente hosi Gabinete Apoia Sosiedade Sivíl, tanba ne’e mak sira tenke halo kontrolu ba progresu konstrusaun igreja ne’e”, Dom Virgílio deklara.
Antes ne’e, Konsultóriu no dezeñu ba Igreja Ai-mutin, nu’udar mós membru Konsellu Pastorál no Komisaun Harii Igreja foun São José Ai-mutin, Cesar Vital Moreira hatete, pagamentu ikus ba projetu ne’e iha fulan Novembru tinan 2019 ho total osan hamutuk millaun 2,5 USD.
Enkuantu, iha fulan Dezembru 2020 to’o ohin loron laiha pagamentu, nune’e osan restu ho montante rihun 480 USD ne’e iha hela Governu liuhosi Gabinete Apoiu Sosiedade Sivíl (GASC-sigla Portugés), ne’ebé agora transforma ona ba SASCAS.
“Ami halo enkontru ona ho Komisaun Ezekutivu Arsebispu Arkidioseze Metropolitana Dili nian iha salaun enkontru Universidade Katólika no rekomenda ba Arsebispu Arkidioseze Metropolitana Dili, Dom Virgílio do Carmo da Silva, SDB, atu husu Governu liuhosi GASC atu Igreja ne’e tenke finansia to’o hotu no osan rihun 480 USD tenke selu,” Cesar Vital Moreira hateten, Tersa (31/08/2021).
Enkuantu, konstrusaun Igreja Ai-mutin ne’e rasik antes ne’e hetan apoiu hosi SASCAS ho millaun 3 USD, no apoiu fundu ikus ne’ebé fó iha tinan 2021 ho montante rihun 4 USD hodi kompleta orsamentu ne’ebé Governu disponinbiliza ba igreja.
1,362 total views, 3 views today
Bele hare Video Seluk :
Subscribe to Timorpost
