DILI (Timorpost.com) Vítima inséndiu Tasi-tolu, ne’ebé evakua mai Palásiu Prezidensiál Bairru Pité nia kotuk, hirus autoridade no líder politiku balun ne’ebe dun líder nasionál Kay Rala Xanana Gusmão buka votus liu husi tulun vítima sira.
“Avó lori ami atu politiza ne’e la iha, Avó ne’e ita hotu hatene, asaun karidade ne’e la’òs foin primeira-vez, la’òs tempu politika mak halo asaun karidade ne’e la iha, Avó kualker dezastre avó direta no besik liu povu, hadomi povu”, vítima Dulce Barros da Costa, informa ba jornalista iha hela fatin provizoriu, Bairru-Pité, Kinta (02/03).
Líder Nasionál ne’e, vizita vitima sira bahihira fila husi Covalima, nune’e vitima sira aprezenta sira nia laran susar no terus ba Xanana Gusmão.
“Momentu akontesimentu sira Bombeiros evakua kedas ami mai Malinamuk ne’ebá, toba kalan rua no loron rua iha ne’ebá, iha lorkraik, Avo fila husi Suai, vizita fatin refere, avó husu ami, nusá imi di’ak ka lae? Maibé ami la iha lifuan atu hatan di’ak ou la di’ak, ami ho de’it matan-wen hasoru Avò dehan ami nia kondisaun mak hanesan ne’e”, haktuir vítima ne’e ho laran triste.
Antes muda ba Bairru Pité, Líder Nasionál ne’e husu ona governu, liu husi ekipa Bombeiros Mali-Namuk, Comoro atu muda sira ba Karantena Tasi-Tolu, maibé parte Bombeiros sira esplika katak, pedidu ne’e parte governu rejeita, ho razaun katak, vitima sira sei estraga fasilidade iha fatin ne’ebé uluk uza ba izolamentu COVID-19.
“Avo ko’alia kedas autoridade iha momentu ne’eba, atu buka kedas fatin atu sai, ita labele haree nune’e, inan isin-rua, labarik ki’ik sira toba ita sente halo nusa, entaun iha momentu ne’eba husu atu ba fatin izolamentu Tasi Tolu, maibé governu hatan katak, fatin estadu nian, la bele ba estraga fasilidade sira no hafo’er iha ne’ebá, entaun avó foti desizaun haree fatin mamuk iha palasiu Prezidente nia kotuk, hodi ami hela provizoriu iha ne’e”. Nia informa.
Iha fatin hanesan, vitima Mário Martins deklara katak, asaun karidade husi Líder Nasionál Xanana Gusmão halo, la’os buka votus, maibé tan líder ne’ebé sempre ho povu iha momentu difísil nia laran.
sira deside tuir Xanana, tanba dezde tinan kotuk bainhira mosu pandemia COVID-19 no dezastre naturál akontese iha Dili no munisipiu sira, ahi han iha merkadu Taibesi, Merkadu Komoro Xanana maka tuun direita ajuda povu no bainhira sidade Dili foer Xanana sempre organiza povu hodi hamoos foaer iha kada bairru sira.
“La’os foin mak ida ne’e de’t, asaun ne’e uluk kedas la’òs hare ba kór, maibé oinsa atu salva povu husi ki’ak no mukit, la’òs tanba polítika”. Mário dehan.
Entretantu, inséndiu ne’ebé akontese iha loron 23 fulan Fevereiru, afeta familia hamutuk 50, maibé dadaun ne’e família hamutuk 39 ho membru hamutuk 178 mak hela provizorimente iha Bairru Pité, inklui mós labarik sira ne’ebé eskola hela iha pré eskolar no ensinu báziku.
2,164 total views, 3 views today
Bele hare Video Seluk :