DILI (timorpost.com) – Tanba Kompaña Meymart halo repacking ka falun hikas hahan at atu faan, Asosiasaun Tane Konsumidór (ATK) konsidera sira viola lei protesaun direitu konsumidór nian.
Prezidente Asosiasaun Tane Konsumidór (ATK), António Ramos da Silva, hatete bainhira kompaña distribuidor sira manipula produtu, ne’e kontra produtu nia marka, viola lei husi nasaun ne’ebé halo produsaun inklui lei Timor-Leste nian.
“Ita-nia distribuidor sira manipula sasán, ne’e kontra ona lei protesaun konsumidór nian, la fó benefisiu ba konsumidór nia saúde”, dehan nia ba Timor Post, via-whatsapp, Segunda (13/02).
Nia haktuir, kompaña ne’ebé repacking ba sasán at atu faan fila-fali ba konsumidór, ne’e kontra lei númeru 8/2018, iha loron 08 fulan-Jullu katak, la proteze saúde konsumidór nian.
Prezidente ATK ne’e esplika, tuir lei protesaun konsumidór nian, estadu iha dever atu defende konsumidór sira inklui hetan asistensia legal husi defensoria públika.
1,066 total views, 3 views today
