DILI (timorpost.com) – Programa Pagamentu Subsídiu Fim do Ano 200 USD, iha Suku Komoro, Postu Administrativu Don Aleixo, Munisípiu Dili, seidauk finaliza tanba xefe família barak liu.
Xefe Suku Komoro, Eurico da Costa de Jesus, hatete Governu liuhosi Ministériu Solidariedade Sosiál no Inkluzaun (MSSI), lansa subsídiu fim do Ano iha loron (6/12), naran aprova husi Ministériu Administrasaun Estatal (MAE), xefe família iha suku Komoro hamutuk 10.054, total orsamentu 2,010,800.00 USD.
Nia hatete, prosesu pagamentu kuaze fulan ida ona, sei iha apanadu signifika husi aldeia 14 seidauk hotu, ohin halo pagamentu hodi konklui nune’e haruka relatóriu ba Ministeriu Solidariedade Sosiál no Inkluzaun (MSSI).
“Ministériu Solidariedade Sosiál, dehan tenke hotu ohin, aban halo relatóriu ami labele hatama osan ba Banku lai tanba loron Sesta liu ona Sábadu no Domingu labele, entaun Segunda mak entrega osan ba Kofre Estadu”, nia informa ba Timor Post Online iha knaar fatin Komoro, Sábadu (07/01).
Nia afirma tan katak, prosesu pagamentu iha suku komoro la’o hela, tanba xefe família barak, seidauk hatene loloos uma-kain hirak mak simu hira la simu no osan hira mak devolve ba Kofre Estadu.
“Ami seidauk hatene lista reklamante ne’e hira, tanba prosesu pagamentu sei la’o hela, depois pagamentu hotu mak hatene loloos”, hatete nia.
Autoridade lokál ne’e dehan, bainhira konklui hotu aldeia 14 ne’e, foin hatene lista reklamante hira, haruka ba Ministériu Administrasaun Estatal (MAE).
Nia dehan, maski lei númeru 32/2018 katak, bandu funsionáriu rendimentu 500 USD ba leten, suku komoro la haree ida ne’e, pagamentu tuir lista ne’ebé Ministériu Administrasaun Estatal (MAE) haruka, ne’e responsabilidade ida-idak nian.
“Iha lei bandu funsionáriu rendimentu dollar Amerikanu 500 ba leten la simu, ami la haree ida ne’e ami fahe tuir lista ne’ebé sira haruka mai, karik hatene funsionáriu ne’ebé la simu, entaun labele haruka kedas lista mai”, nia deklara.
1,943 total views, 3 views today
Bele hare Video Seluk :
Subscribe to Timorpost
