DILI (timorpost.com) – Governu Liuhosi Autoridade Munisípiu Dili, prepara ona fatin ba negosiante sira iha merkadu Taibesi, maibé sira nafatin okupa fatin estasionamentu hodi fan sasán.
“Ita ko’alia kona-ba negosiante iha merkadu Taibesi, sira lahatene tempu feriadu sira kontinua fan sira-nia produtu okupa hela fatin estasionamentu ne’ebé transporte públika sira prienxe ne’e”, dehan Koordenador Merkadu Taibesi, Antonio Manuel de Araujo, ba Timor Post Online iha nia knaar fatin, Kinta (08/12).
Nia dehan, maski iha ona regulamentu maibé negosiante sira kontinua fan sasán iha liña estasionamentu no mós trotoar leten.
“Ita sempre ko’alia ba sira, ohin loron feriadu sira uza fatin estasionamentu hodi fan sira-nia sasán, maibé loron servisu hanesan Segundu to’o Sesta transporte sira para iha liña estasionamentu nian”, katak nia.
Koordenador ne’e hatete, karik loron servisu vendedor ida nunka fan sasán iha fatin estasionamentu, maibé negosiante ambulante fan sigaru mak fan iha trotoar leten.
Tanba ne’e nia dehan, negosiante sira ne’e la’ós ema ne’ebé hela iha merkadu Taibesi, maibé husi bairru seluk tula sasán mai fan, maibé sira lahatene katak fatin ne’e la’ós fatin atu fan sasán.
“Negosiante sira hatene, maibé sira fan nafatin, ha’u fi’ar iha tempu badak sei iha regulamentu ida forte atu regula negosiante ambulante ne’ebé fan sasán iha fatin estasionamentu nian”, tenik nia.
Ikus nia dehan, se sira kontinua fan iha fatin Estasionamentu mak sei aplika sansaun ba sira tanba Governu kria ona kondisaun ba sira.
989 total views, 6 views today
