Dili (timorpost.com) – Governu liuhusi Ministériu Solidariedade Sosiál no Inkluzaun (MSSI), Tersa (06/12), sei halo lansamentu subsídiu Fim do Ano, 200 USD ba uma-kain, letivu 2022, hahú husi Munisípiu Dili, iha Suku Bekora, Komoro, Kamea no Lahane Oriental ne’e iha loraik, tanba dadeer ne’e xefe suku ho ekipa sei ba iha Banku Nasionál Timor-Leste (BNCTL).
Diretór Jerál Administrasaun Finansas MSSI, Rui Manuel Gago Exposto, hatete sira hakarak partilla informasaun ba públiku katak bazeia ba dekretu Lei númeru 37 ne’ebé hetan reziozu ba númeru 82 kona-ba subsídiu fim do ano, 200 USD. Tanba ne’e MSSI servisu hamutuk ho banku BNCTL sei realiza pagamentu ba Munisípiu Dili, hahú aban.
“Xefe Suku sira hamutuk ho ofisial sira halo pagamentu subsídiu 200 USD. Sei halo levantamentu osan tuir kalendáriu ne’ebé BNCTL partilla tiha ona ba iha Postu Administrativu ida-idak”, nia hateten iha Edifísiu Sentrál, MSSI, Kaikoli, Segunda (05/13).
Portantu, nia dehan ba Munisípiu 13 inklui RAEOA, sei halo levantamentu osan ba subsídiu fim do ano, iha loron 12 fulan Dezembru tinan 2022.
“Semana oin BNCTL sei mobiliza orsamentu ba iha Munisípiu sira iha Postu Administivu sira ne’e iha loron 12 fulan Dezembru, ba loron 13 sei mobiliza osan ba iha Postu Administivu sira ne’ebé hakerek ona iha kalendáriu, hahú 13 ba to’o 15, mobiliza orsamentu no prosesu pagamentu ne’e ami sei la’o tuir kalendáriu ne’ebé BNCTL fó tiha ona”, nia afirma.
Enkuantu tuir dadus versaun ikus MSSI simu husi Ministériu Administrasaun Estatál (MAE), hamutuk 339.954 uma-kain mak elejivel ba subsídiu ida ne’e.
Dokumentu sira ne’ebé maka benefísiu sira presiza lori mak Fixa família orijinál, Eleitorál ka Billete Identidade no pasaporte.
1,478 total views, 3 views today
