Dili (timorpost.com) – Negosiante Minoridade, Patricio Colo, husi Suku Abani, Postu Administiva Pasabe, Munisípiu Rejiaun Administrativa Espesiál Oe-Kusi Ambenu (RAEOA), hakarak halo negosiu iha sidade Dili liuhusi fan pentolan hodi ajuda nia Inan ba nesesidade uma laran.
“Ha’u fan pentolan iha foin lalais ne’e, maibé ha’u-nia negósiu kada loron ha’u bele hetan 15 USD ou 20 USD. Osan ne’ebé ha’u hetan balun kirim ba ha’u-nia inan tanba hau-nia Aman mate ona, no maun alin laiha”, nia hateten ba Timor Post online iha Area Tasi-Tolu, Domingu (27/11).
Nia dehan, osan ne’ebé hetán ne’e halo jestaun ho didi’ak, tanba ne’e balun manda ba Oe-kuse, balun rai hodi kontinua halo negósiu.
Negosiante Minoridade ne’e konta nia moris mai nia mesak de’it ho nia inan, nia Aman mate no Maun-Alin laiha, entaun nia haree situasaun hanesan ne’e, nia deside lakohi ba Eskola, no mai buka osan iha Dili liuhusi fan pentolan hodi ajuda nia Mama.
“Ha’u-nia Papa mate ona, entaun ha’u mak foti desizaun hodi fan pentolan tanba ha’u-nia Maun-Alin laiha no ami nain-rua hau-nia Inan moris ki’ak, ha’u mai buka osan para sustenta nesesidade família”, nia relata.
Otas nurak ne’e relata, nia fan sasán ne’e fulan ida ona, Pentolan ne’ebé fan ne’e nia sosa de’it iha kampung Baru no fatin-fatin iha Dili laran, entaun tuku 8:00 dadeer hit ain husi uma hakat ba Area Tasi-Tolu hodi fan pentolan to’o tuku 5:00 mak foin fila ba uma.
“Dala-ruma ha’u la’o loron tomak mós ema la sosa ida, ha’u sente triste uitoan maibé la hamate ha’u-nia vontade, maibé ha’u nafatin esforsu aan halo negósiu hodi aguenta moris”, nia hakotu.
778 total views, 6 views today
