DILI (timorpost.com) – Atu responde ba komunidade sira bainhira hetan dezastre naturais iha tempu udan ne’e, Sekretáriu Estadu Protesaun Sivíl (SEPS), Joaquim Gusmão, informa daudaun ne’e sira-nia sasán stock sufisiente hela iha armazein.
“Ita-nia autoridade seguransa protesaun sivíl, ita harii ona ita mós iha ona Komandante Operasionais iha Munisípiu sira, hela de’it Ataúru mak seidauk no ita kontinua halo mós koordenasaun ho autoridade munisípiu sira hotu,” dehan Joaquim Gusmão, ba Timor Post iha Parlamentu Nasionál, Kinta (17/11).
Nia aumenta, la’ós ida ne’e de’it maibé sempre koordena mós ho parseiru sira ne’ebé sempre hamutuk ho sira, hanesan Kruz-Vermella, CAR Internasionál, Ajénsia sira ne’e hotu nafatin iha reuniaun koordenasaun ho sira.
“Atu bele antesipa dezastre akontese ba oin, agora iha tempu udan, no ita mós tau stock sasán iha munisípiu sira hodi apoiu ba vítima sira kuandu akontese dezastre ruma,” hateten nia.
Sasán sira ne’ebé tau stock iha munisípiu sira ne’e mak hanesan ba hahán no mós la’ós hahán ba apoiu emerjénsia ninian, tanba ne’e sufisiente hela ba tinan ida ne’e hodi apoiu vítima sira kuandu akontese dezastre.
“Sasán hahán no mós la’ós hahán ne’ebé mai rai stock iha kada munisípiu ne’e kompostu husi kada munisípiu iha 500 pakote atu bele antesipa ida ne’e,” nia deklara.
Maibé, kuandu munisípiu ida mak akontese dezastre barak hodi sira-nia sasán menus ka la to’o ona atu apoiu ba vítima sira, tenke halo fali relatóriu mai bele haruka tan ba sira.
1,299 total views, 3 views today
Bele hare Video Seluk :