DILI (Timorpost.com)—Kompañia ASL Associates PTY Lda, husi Brisbane Australia, ohin Kinta (10/11), hala’o enkontru ho Prezidente Repúblika (PR), José Ramos Horta, hodi informa, tuir kompañia nia haree iha oportunidade Timor-Leste, atu dezenvolve Komérsiu Indústria Adubu Minerál Orgániku.
“Ami mai kongratula Prezidente Repúblika, hafoin manan eleisaun ne’e, hodi haree ba oportunidade balun iha Timor-Leste, atu dezenvolve liuhusi loke investimentu komérsiu indústria adubu minerál orgániku iha Timor tanba haree rai ne’e iha poténsia”, Portavós ASL Associates PTY Lda, Lewis Hunter, dehan iha Palásiu Prezidensiál, Bairru-Pité.
Lewis dehan, bainhira implementa kada planta sei fó serbisu ema 100, nune’e populasaun joven Timor sei sente orgullu.
Enkontru ohin ne’e inisiál ho Xefe Estadu no husi kompañia ne’e sei fila fali mai iha fulan rua tan, atu hasoru Xefe Estadu, hodi diskute kona-ba progresu husi planu refere.
“Planu ne’e sei suporta agrikultura lokál, tanba ami sei produs 250.000 adubu Minerál Orgániku ba uzu doméstiku no mós ba internasionál,” nia informa.
Nia aumenta, ida ne’e hanesan kompañia nia vizita primeira vés mai Timor-Leste, nune’e iha ona enkontru hala’o ona ho departamentu negósiu no finansas, hodi haree kona-ba detallu komérsiu nian iha Timor-Leste.
“Ami hetan suporta husi Prezidente Repúblika, José Ramos Horta, tanba ho ninia esperiénsia internasionál hanesan hela iha estranjeiru no serbisu Governu rai seluk entaun Xefe Estadu hatudu inérsia ba saida mak ami atu halo iha Timor-Leste”’, nia haktuir.
Husi enkontru ne’e, Xefe Estadu enkoraja kompañia refere, tanba planu ne’e sei fó oportunidade boot ba kampu traballu, komérsiu no esportasaun.
“Entaun Xefe Estadu motiva ami atu kontinua halo negosiasaun ba planu refere ho ninia suporta tomak,” nia hakotu.
4,219 total views, 3 views today
