DILI (timorpost.com) — Ministériu Solidariedade Sosiál no Inkluzaun-(MSSI), liuhusi Diretór Jerál Administrasaun no Finansas, Rui Manuel Gago Exposto, hatete kalendáriu atu fahe subsídiu 200 USD, ba kada uma-kain ne’e seidauk serteza.
“Horisehik Konsellu Ministru foin halo fali revizaun ba dekretu lei n⁰.37/2022 kona-ba subsídiu fim do ano, ita espera iha tempu badak Prezidente Repúblika sei promulga, kuandu promulga ona mak Ministériu Solidariedade Sosiál no Inkluzaun, bele implementa,” nia hateten, iha Salaun MSSI, Kinta (10/11).
Nia esplika, tanba subsídiu fim do ano ne’e Konsellu Ministru, fó fiar ba Ministériu Solidariedade Sosiál, mak sei halo implementasaun hamutuk ho Ministériu Administrasaun Estatál.
“Tanba ne’e kuandu Prezidente Repúblika, halo ona promulgasaun hafoin parte MSSI sei trasa kalendáriu ba implementasaun nian, hodi deside bainhira mak atu hahú no termina iha sá loron,” hateten nia.
Nia reforsa, daudaun ne’e seidauk iha kalendáriu ba implementasaun tanba sei haree ba iha Dekretu-Lei ne’e, tanba atu la’o tenke iha baze legál ida, tanba ida ne’e liga ho osan, entaun seidauk iha lei ida autoriza atu implementa, mak implementa uluk ne’e la di’ak.
“Maibé ba faze preparativus nian ami ho ekipa tékniku sira halo hela preparasaun hamutuk ho Ministériu Administrasaun Estatál, agora mós kontinua halo hela preparasaun,” hateten nia.
Nia haktuir, orsamentu atu implementa ne’e mai husi orsamentu retifikativu iha tinan 2022 ninian ne’ebé Governu propoin ba Parlamentu Nasionál no hetan ona aprovasaun, purvolta millaun 70.000 USD, hodi apoiu subsídiu fim do ano ho montante 200 USD, ba sidadaun vulneravel sira hotu ne’ebé nia rendimentu menus husi 500 USD,” nia termina.
Fó hanoin fali katak, antes ne’e Vise-Primeira Ministra no Ministra Solidariedade Sosiál no Inkluzaun (MSSI), Armanda Berta dos Santos, dehan implementasaun subsídiu fim do ano 200 USD, ne’e sei hahú iha loron 16 fulan Novembru tinan ida ne’e.
4,924 total views, 3 views today
Bele hare Video Seluk :
Subscribe to Timorpost
