Dili (timorpost.com) – Negosiante Euzebio Coi, husi Aldeia Nianapu, Suku Bobometo, Postu Administrativa Oe-Silo, Munisípiu Rejiaun Administrativa Espesiál Oe-kuse Ambeno (RAEOA), deside faan pentolan hodi sustenta família.
Nia hatete, atu hetan osan hodi sustenta moris lor-loron nian presiza servisu maka’as, tanba osan sei la mosu de’it maibé tenke buka liuhusi maneira oi-oin ezemplu halo negósiu.
“Ha’u husi Munisípiu RAEOA mai buka osan liuhusi faan pentolan iha Dili hela iha area Ai-tarak laran hahú iha tinan 2014 to’o ohin loron hodi atende presiza uma laran, tanba ita tuur de’it iha uma ne’e se maka fó osan ba ita”, nia hateten ba Timor Post online iha Jardín 05 Maiu, Domingu (02/10).
Nia dehan, pentolan ne’ebé nia faan sosa husi Komoro, naan kilo ida ho presu 5 USD hotu nia halo fali kabuar atu sai pentolan depois maka tau iha aikesak ida ho presu 0,25 sentavu.
Osan sira ne’ebé nia hetán husi faan pentolan nia fó ba nia ferik oan hodi hola nesesidade família nian, oan sira-nia eskola no balun kirim ba Oe-Kuse atu nia Ama ho Apa atende lia ruma.
“Ha’u sai husi uma husi tuku 2:00 meudia ba faan pentolan haleu Díli laran, depois husi tuku 8:00 kalan maka ha’u foin tama uma, ne’ebé loron ida bainhira ema sosa hotu pentolan, ha’u bele hetan 50 USD”, Negosiante ne’e konta.
Durante nia deside faan pentolan hahú husi tinan 2014 ne’e, rezultadu mak halo ona Uma fatuk bo’ot ida iha Oe-Kuse.
Nia haktuir, agora ne’e nia kontinua faan pentolan, balun nia poupa hodi prepara ba oan sira-nia eskola, tanba nia oan nain-3 ne’e balun Eskola Primaria no balun seidauk Eskola no mós osan balun atende uma laran.
1,799 total views, 3 views today
Bele hare Video Seluk :
Subscribe to Timorpost
