Dili (Timor Post)- Negosiante Julio da Cruz, husi Munisípiu Baukau moris hanesan povu baibain lor-loron faan manu iha estrada públika área Ai-Mutin hodi sustenta nesesidade Uma laran no oan sira-nia Eskola.
“Depende ba vontade ida-idak nian, maski faan iha estrada ninin, iha loron manas no rai rahun, maibé hakarak ka lakohi tenke simu realidade, tanba Ekonomia uma laran no selu oan sira-nia Eskola obriga ha’u mai faan iha estrada públika ne’e”, nia hateten ba Timor Post Online iha Ai-mutin, Segunda (01/08).
Nia dehan, loron-loron faan iha ne’e depende ba ema atu hola ne’e, loron ida ema mai sosa, dala-ruma ema la mai sosa ida, maibe nia pasensia tuur hodi faan nafatin.
“Portantu ami faan iha merkadu laran maibé fatin maka laiha tanba ne’e maka ha’u deside faan fali iha dalan ninin de’it”, nia hateten.
Julio esplika, manu hirak ne’e lá’os ninia rasik, maibé nia ba sosa iha Munisípiu Likisá ho folin $12 $11, $10, $7, tanba ne’e sira faan bazea ba manu de’it, kuandau manu boot nia folin $12, $13 no manu Kiik nia Folin $5, $7.
Nia hatete, sira faan iha estrada públika ne’e karik sira hetan dezastre ka problema ruma, sira la fó sala ba ema ida, tanba sira-nia hakarak.
“Osan sira ne’ebé ha’u hetan husi faan manu ne’e hodi hola sira nia farda, buku no hahán loron-loron, tanba oan hamutuk nain-6 sira eskola hotu, maibé sei iha nivel sekundária, pre-sekundáriu no primariu no ha’u-nia ferik oan mós Vida Agrikutura”, nia aprezenta.
Enkuantu Julio nia atividade negósiu ne’e lor-loron, ba faan manu iha estrada ninin sempre tuku 07:00 otl depois 09:00 otl kalan maka fila.
1,431 total views, 3 views today
