Dili (Timor Post) – Governu Timor-Leste liuhusi Ministériu Turizmu Komérsiu no Indústria (MTKI), hamutuk ho Ajénsia Estadus Unidus Amérika ba Dezenvolvimentu Internasionál (USAID) realiza workshop kona-ba lista prinsipál ba Parseria Públika no Privada (PPP).
Ministru Turizmu Komérsiu no Indústria, José Lucas do Carmo da Silva, hatete objetivu prinsipál husi workshop ne’e oinsá atu fahe informasaun detalla kona-ba konseitu ou modalidade PPP ne’e rasik ba Ministériu relevante sira hotu ne’ebé hola parte.
“Workshop ne’e sei iha diskusaun lubuk ida ne’ebé husi liña ministeriál hotu-hotu, hodi fó sira-nia hanoin liuliu kona-ba prioridade ba modalidade ida ne’e, atu nune’e ita hetan lista ikus nian iha PPP, hodi bele fó sai ba Públiku kona-ba projetu PPP ne’ebé ita iha,” nia hateten iha Ministériu Finansas, Salaun Auditorium, Segunda (25/07).
Nia subliña, setór turizmu ne’e hanesan ema hotu hatene katak, iha kompetisaun boot iha merkadu Internasionál, husi ida ne’e, maski Timor-Leste nasaun ki’ik, maibé iha mós turizmu.
“Ita iha ne’e atu ko’alia kona-ba projetu boot sira ne’ebé durante ne’e ita serbisu hamutuk ho ita-nia parseiru sira husi USAID, liuliu husi Turizmu For All, ne’ebé prepara hela mak hanesan konsentra iha Kristu Liurai, Kristu Rei nian, ho mós Portu antigu Dili nian, ida ne’e mak ita hakarak atu haree ba pakote sira ne’e, hodi oinsá ita finaliza para bele fó sai ba Públiku,” nia afirma.
Nia haktuir tan, agora saida mak importante atu halo hodi dezenvolve pakote sira ne’e, no hatudu Timor-Leste ninia unit news la hanesan ho Paizes seluk, atu halo atrasaun mai iha Timor-Leste ho pakote ne’ebé úniku.
Iha biban hanesan Diretora ba Misaun USAID, Zema Semunegus, afirma atu fó hatene katak, dezde tinan 2002 depois de durante ne’e, USAID oferese ona, orsamentu hamutuk totál rihun 350 USD, hodi apoiu programa Governu nian liuliu hakabit dezenvolvimentu turizmu iha Timor-Leste.
“Iha millaun 14.9 USD, mak USAID oferese ba projetu Turizmu For All, no saida mak ami atu apoiu ba projetu ida ne’e ho ninia orsamentu mak barak liu atu ajuda kria PPP,” nia dehan.
Husi ida ne’e, tuir USAID nia observasaun iha Timor-Leste kona-ba buat ne’ebé Timor-Leste enfrenta liuliu ba iha dezenvolvimentu turizmu, nune’e husi parte sira katak iha obstákulu barak loos.
“Iha obstákulu barak loos ne’ebé tuir ami-nia haree, liuliu kona-ba Governu Timor-Leste ninia asesu ba rekursu sira, ne’e mak seidauk másimu. Entaun rekursu ne’e inklui rekursu umanu, ho ida ne’e, ami kontinua ajuda maski iha limitasaun ami prontu atu ajuda, tanba ne’e mak oras ne’e ami iha ne’e,” nia hakotu.
Enkuantu partisipante iha workshop ne’e maka, husi nivel aas sira husi USAID no Governu TL, Diretora Misaun USAID, reprezentante MKAE, Vise Ministériu Finansas, MTCI, Ministériu Planeamentu no Territóriu (MPT), MTK, SEFOPE, Sekretáriu Estadu Kooperativu (SEK), Sekretáriu Estadu Ambiente (SEA), SEAK, Komérsiu Investimentu Timor-Leste, MJ, MAP, Ministériu Administrasaun Estadu, MOP, Autoridade Prezidente Dili, Administradór munisípiu Atauru, CNC.
1,788 total views, 6 views today
Bele hare Video Seluk :
Subscribe to Timorpost
