DILI (Timor Post)- Embaixadora Timor-Leste iha Austrália, Ines Almeida, hatete tinan ida ne’e Ai-fuan iha Austrália laiha, tanba ne’e difisil ba Timoroan sira atu ba servisu iha ne’ebá.
“Timoroan sira ne’ebé kompañia rekruta ona to’o agora balun seidauk ba tanba Austrália agora iha problema ida inundasaun, entaun Ai-fuan kuaze laiha hotu,” nia hateten iha Palásiu Governu, Kinta (21/07).
Tanba ne’e, nia dehan horikalan nia hetan ona briefing husi to’os na’in-sira iha Austrália katak tinan ida ne’e sei han tempu mak lori traballadór sira ba Austrália.
“Tinan ida ne’e ita-nia traballadór sira sei ba Austrália han tempu tanba agora Ai-fuan laiha, ita kuandu ba atu bele ku’u Ai-fuan,” deklara nia.
Nia aumenta tan, tanba ne’e ba sira ne’ebé hetan ona kontratu husi kompañia iha Austrália atu ba ne’e sei ba nafatin, maibé presiza han tempu kleur uitoan tanba Austrália iha problema kona-ba Ai-fuan.
“Tanba inundasaun iha Austrália ne’e estraga hotu to’os na’in sira nia Ai-fuan entaun agora iha ne’ebá ai-fuan menus, tanba ita-nia traballadór sira ba servisu mak ku’u Ai-fuan de’it,” subliña nia.
Nia mós dehan tan, agora na’in ba kompañia tolu iha Austrália mai ona iha Timor-Leste hodi halo rekrutamentu ba sidadaun sira atu ba servisu oho animál no ko’a naan.
Tanba sira rasik mak hakarak mai halo rekrutamentu direita, no kritériu mak tenke hatene Inglés uitoan no badinas, tanba sira hakarak dentru husi 15 minutu animál ida oho no fera hotu ona.
1,802 total views, 3 views today
