DILI (Timor Post)-Governu liuhusi Ministériu Turizmu Komérsiu no Indústria (MTKI), prontu sosa tais sira ne’ebé antes ne’e rekolla ona hosi Komunidade Atoni-oan sira, maibé la konsege lori ba fa’an iha Expo-Dubai.
“Agora Ministériu kaer hela osan no prepara ona prosesu atu selu inan feton sira husi Oé-Kusse, nia Tais ne’e no oinsá atu sosa,” dehan Ministru Turizmu Komérsiu no Indústria, José Lucas do Carmo da Silva, iha Palásiu Governu, Kuarta (13/07).
Nia aumenta tan, tanba ne’e Governu komprometidu atu sosa Tais sira ne’e no iha ona prosesu nia laran, tanba durante ne’e parte Koordenadór Jerál Expo-Dubai ho Tais na’in sira ne’e Komunikasaun la’o hela.
“Tais ne’e iha ona prosesu nia laran atu selu ka Governu atu sosa, maibé inan feton sira lori fali ba Parlamentu Nasionál, hodi levanta ne’e ha’u la hatene, sira atu fa’an fali iha ne’ebá ka oinsá, maibé Governu komprometidu atu sosa no prosesu ona,” hateten nia.
Nia esplika, Tais sira ne’e momentu foti atu lori ba Expo-Dubai, maibé iha Kontentór ida mak konsege lori ba hodi fa’an, maibé Kontentór ida la konsege tanba momentu ne’ebá iha perturbasaun saúde públiku nia Covid-19, entaun hodi sasán husi rai seluk labele tama ona, ho ida ne’e mak Kontentór ida la konsege lori ba.
Enkuantu Tais iha Kontentór ida nia laran ne’ebé la konsege lori ba ne’e nia parte la bele fó sai nia númeru klaru tanba nia la kapta, maibé lista iha Koordenadór Jerál Expo-Dubai iha.
1,848 total views, 3 views today
Bele hare Video Seluk :