DILI (Timor Post)–Delegasaun Kompañia Telemor, ne’ebé lidera husi Diretór Jerál, Tran Van Bang, ho ekipa ohin hala’o enkontru ho Prezidente Repúblika José Manuel Ramos Horta, hodi hato’o relatóriu ba atividade ne’ebé durante ne’e sira hala’o iha Timor-Leste.
“Ohin ami kontente ho vizita ofisiál mai hasoru Prezidente Repúblika, ba dala uluk, ami kongratula ba nia segundu mandatu nu’udar Prezidente. Ho nia lideransa sei hadi’a kresimentu ekonomia no dezenvolvimentu nasionál,” nia hateten, hafoin remata enkontru ho Xefe Estadu, iha Palásiu Prezidensiál, Bairru-Pité, Segunda (11/07).
Nia hatutan, iha enkontru ne’e sira relata ba Prezidente Repúblika, kona-ba Telemor nia ezisténsia durante tinan 10 iha Timor-Leste.
“Tinan 10 dezde 2012, ami halo mudansa barak hodi hadi’a telekomunikasaun iha Timor-Leste, ami promove dezenvolvimentu teknolojia, hadi’a moris sosiál, no atendementu telekomunikasaun, ami sente priviléjiu no hakarak sai númeru um operadór telekomunikasaun iha Timor-Leste,” nia afirma.
Nia dehan, husi enkontru ho PR Horta sira hato’o asuntu ida seluk, maka solusaun ICT iha Timor-Leste durante tinan 10 nia laran, hanesan Sinema, Mosan, no seluk tan.
“Ami ko’alia mós kona-ba vizaun no estratéjia ba tinan hirak tuir mai, atu hasa’e kualidade liña internet. No sira mós haree ona planu Governu nian, mak sei dada kabu submarinu, entaun Telemor mós planu atu introdús teknolojia 5G, no koneksaun Broadband iha Timor-Leste”, nia promete.
Enkuantu hafoin remata hasoru malu ne’e, Prezidente Repúblika, José Manuel Ramos Horta, apresia tebes ho Telemor, no hato’o nia suporta no apoiu tomak ba atividade hirak ne’ebé Telemor realiza iha Timor-Leste, durante tinan 10 nia laran.
“Iha biban hanesan Prezidente Repúblika, hato’o mós ninia admirasaun ba Governu Vietnam, la’ós de’it ba istória ne’ebé nia iha, maibé liuliu iha parte evolusaun ekonómika, no dezenvolvimentu ne’ebé Governu Vietnam hatudu durante ninia ezisténsia,” sita PR Horta ninia mensajen husi portavós PR.
Nune’e, PR Horta hato’o ninia suporta ba Vietnamita sira hotu ne’ebé hakarak mai investe iha Timor-Leste, no ninia apoiu tomak iha ámbitu rejionál, bilateral, no mós iha ámbitu Internasionál.
“Prezidente Repúblika José Ramos Horta, hakarak haforsa liután, relasaun ho Governu Vietnam, la’ós de’it iha ámbitu dijitalizasaun teknolójika, maibé liuliu iha ámbitu produsaun agríkola,” nia hakotu.
1,866 total views, 6 views today
Bele hare Video Seluk :
Subscribe to Timorpost
